南韓記憶體晶片巨頭SK海力士（SK Hynix）過去一星期經歷極端市況。公司10日先喺美國納斯達克（Nasdaq）掛牌，以每股149美元（約1,162港元）發行預託證券（ADR），集資265億美元（約2,067億港元），創外國企業赴美上市最大集資紀錄，首日仲飆升12.8%。點知一個週末之後，首爾股價13日暴瀉15.37%，係公司歷來最大單日跌幅，單日市值蒸發逾1.2萬億港元，ADR同日再挫9.3%；三星電子（Samsung Electronics）急跌10.7%，拖累韓國綜合指數（KOSPI）瀉8.95%，觸發20分鐘熔斷；海力士市值跌穿9,000億美元（約7萬億港元），較6月高位回落約35%。

跌市導火線，係韓國投資證券一份報告，估計海力士次季營業利潤約60.4兆韓圜（約3,180億港元），雖創歷史新高，但低過市場共識嘅65兆韓圜，原因係HBM高頻寬記憶體佔比高、多屬預先議價嘅長期合約，售價升幅追唔上現貨市場。另外，總統李在明政府6月底公布2,000兆韓圜（逾10萬億港元）「三大躍進」超級計畫，三星同海力士將斥800兆韓圜喺西南部興建四座晶圓廠，目標五年內令DRAM產能倍增，市場憂慮HBM日後供過於求、報價受壓；Meta月初亦被爆籌組「Meta Compute」，向外出租過剩AI算力，令市場重新評估企業自建AI基建嘅需求。

台灣分析師翁偉捷指出，南韓資金高度集中喺三星、海力士同槓桿ETF，放大咗市場波動，而外資持續撤離、韓圜偏軟先至係跌市關鍵。外資13日單日沽售1.7兆韓圜（約86億港元）南韓股票；南方東英喺港掛牌嘅海力士兩倍槓桿產品當日更瀉33%，較6月25日高位累跌近七成。

劇情14日急轉：海力士喺首爾盤中一度再插9%，KOSPI低見6,448點、較6月高位回落近三成，惟尾市海力士倒升3.69%收市。隔晚美國6月CPI按年升3.5%、低過預期，聯儲局加息憂慮降溫，加上巴克萊（Barclays）首予「增持」評級、目標價330美元（約2,574港元），ADR一夜狂飆27%。今日早段KOSPI一度反彈近7%，海力士再升逾9%。未來資產證券董事總經理徐相英提醒，ADR暴升主要由槓桿ETF同期權市場帶動，唔宜過分解讀；南韓央行日前發表報告則強調，全球晶片仍然供不應求，AI帶動嘅超級週期料會持續一段時間。