中國海關總署周二（14日）公布，以美元計，6月出口按年急升27%，係2021年10月以來最快，遠勝市場預期；進口更飆升36%，創近五年最大升幅。單月貿易順差達1,256億美元（約9,800億港元），高過5月嘅1,054億美元。官方同分析普遍認為，動力主要嚟自全球人工智能（AI）熱潮帶動嘅晶片價格飆升，海關數據顯示上半年電子元件等算力硬件進出口達5.13萬億元人民幣，急增56.6%。

當中對德貿易失衡尤其矚目。中國6月對德出口按年升27.2%，自德進口就只係微升3.1%；上半年計，對德出口升19%至675億美元（約5,265億港元），進口僅多1.8%至452億美元，令德國對華貿易逆差達223億美元（約1,740億港元）。

德國過去長期受惠中國經濟崛起，向中國輸出汽車、機械同專門技術，如今形勢逆轉：中國電動車喺歐洲市場愈搶愈多份額，機械設備技術亦步步進逼，德國反而喺電池、藥品前體等領域高度依賴中國。北京仲重點扶持半導體、機械人、量子科技、氫能、生物科技等未來產業，同德國高科技政策焦點高度重疊，競爭勢必加劇。

晶片係今次數據嘅主角：6月半導體出口金額按年翻逾一倍，數據處理設備出口亦升53.1%。不過，凱投宏觀（Capital Economics）中國經濟主管普里查德（Julian Evans-Pritchard）提醒，晶片出口增幅「完全是價格造成的」，即記憶體晶片持續短缺推高價格，實際出口數量按年反而下跌；進口金額同樣被晶片價格推高，唔代表內需轉旺。另外，汽車出口按年躍升69.6%，反映中國電動車需求強勁；隨住北京收緊稀土出口管制，6月稀土出口量按年跌34%。

保銀資產管理總裁兼首席經濟學家張智威認為，數據反映中國製造業嘅競爭力同韌性，但亦會令中國同貿易夥伴、特別係歐洲嘅緊張關係百上加斤。6月中國對歐盟順差擴大至329億美元；對美出口就升13.9%，中美關係喺美國總統特朗普5月訪京後有所回穩，惟貿易失衡仍係磨擦根源。

值得留意，國家統計局周三（15日）公布第二季GDP按年僅增4.3%，低過預期嘅4.5%，係2022年底以來最慢，同外貿「開快車」形成強烈對比，反映內需疲弱。海關總署副署長王軍承認下半年外貿面臨一定壓力，但強調基本盤依然穩固；市場焦點轉向7月底政治局會議會否加碼刺激經濟。