蘋果公司上星期五喺美國加州北區聯邦法院入稟，控告OpenAI、旗下硬件公司io Products以及兩名前蘋果員工盜取商業機密及違約，長41頁嘅訴狀直指「由技術人員到硬件總監，再聯同商業夥伴，OpenAI每一個層級都喺度偷緊蘋果嘅商業機密」，更形容對方嘅硬件業務「建基於最搖晃嘅根基上，核心已經腐爛」。兩間公司2024年先至高調結盟，將ChatGPT整合入iPhone，今次可謂正式反面。

訴狀指目前有超過400名前蘋果員工過檔OpenAI，關鍵人物係曾主理iPhone同Apple Watch產品設計嘅前副總裁Tang Tan，即現任OpenAI硬件總監。蘋果指控佢招聘時用內部代號套料，指示在職應徵者帶「實物零件」包括電池同邏輯板，係面試嘅時候做「示範講解」，甚至流傳離職文件教新人避開蘋果嘅離職保安審查。另一被告、前系統電機工程師Chang Liu今年1月離職時冇交還公司手提電腦，據指下載咗數十份涉及未發布產品規格、工程簡報嘅機密文件。蘋果話2月已去信OpenAI表達關注但一直冇回音，今次要求法庭頒禁制令兼索償；OpenAI就回應話「對其他公司嘅商業機密冇興趣」。

兩公司交惡，源於OpenAI去年斥資約65億美元（約507億港元）收購蘋果前設計總監艾夫（Jony Ive）有份創辦嘅io Products進軍硬件，首款AI裝置預計今年內面世；蘋果今年秋季推出嘅新版Siri，亦已改用Google Gemini模型。官司仲隨時拖累OpenAI上市大計：公司6月已秘密提交上市文件，估值傳逾1萬億美元（約7.8萬億港元）。

同Sam Altman積怨已久嘅Elon Musk即刻喺X抽水，改花名叫佢「Scam Altman」，笑佢「將詐騙提升到全新境界」，仲翻炒對方2023年國會作供嘅舊相寸爆：佢口中「熱愛嘅工作」其實係呃人。奧特曼反擊：「老友，係你向公開市場投資者兜售短期太空數據中心」，暗指Elon只係氹投資者落疊，帖文錄得逾1,100萬瀏覽；馬斯克回敬「我哋明年開始發射，假釋官批准嘅話你可以嚟參觀」，暗示對方遲早入獄。據報奧特曼仲補多句：GPT-5.6有幾強，「最可靠嘅指標就係馬斯克又開始針對我」。

罵戰主角AI1衛星，係SpaceX上月中以史上最大IPO掛牌、集資750億美元（約5,850億港元）之前公開嘅太空數據中心設計：峰值運算150千瓦，翼展70米闊過波音747，配液冷散熱器、防微隕石護罩同可換裝晶片嘅中央運算模組，將喺德州Bastrop嘅Gigasat廠房量產，兩枚原型機排期明年初升空。

有法律學者指，喺加州大規模挖角本身唔違法，但若證實有員工帶走機密文件而OpenAI又用咗，問題就大；而馬斯克自己控告OpenAI背棄非牟利初衷嘅官司，據報5月先啱啱敗訴，佢揚言上訴，呢場AI世紀恩怨，睇嚟仲有排做。