美伊戰火再度升級。美軍中央司令部表示，周日凌晨完成一周內第三輪空襲，擊中伊朗約140個目標，包括導彈及無人機發射場、海軍設施、彈藥庫、通訊網絡同海岸監視系統，三晚行動合共打擊超過300個目標。今次行動起因係伊朗革命衛隊襲擊霍爾木茲海峽一艘懸掛塞浦路斯旗嘅貨櫃船，令船隻起火、機艙嚴重受損，船員被迫棄船；阿曼當局救起23名船員，一名印度籍船員失蹤，印度外交部正協助搜尋。德黑蘭隨即宣佈再度關閉海峽「直至另行通知」，並向巴林、科威特、卡塔爾、約旦同阿曼發動導彈及無人機襲擊。

美國總統特朗普接受NBC訪問時揚言，美軍噚晚「炸到佢哋落花流水」，並堅稱海峽「就我哋而言係開放」；國防部長赫格塞斯就喺社交平台X留言，指伊朗「做咗差劣嘅選擇，而家要付出代價」。伊朗議長兼首席談判代表加利巴夫反擊話「單邊協議嘅時代已經結束」。革命衛隊聲稱周日再擊中第二艘「違規」船隻，美軍就表示戰機擊落咗一枚瞄準商船嘅伊朗巡航導彈同一架自殺式無人機；伊朗半官方通訊社另報道，南部賈斯克港一名海軍中尉喺空襲中喪生。

海灣多國同日再響警報。卡塔爾軍方攔截來襲導彈，惟攔截期間碎片墜落造成三人受傷，包括一名兒童；駐有美國海軍第五艦隊嘅巴林第三度拉響導彈警報；科威特指無人機襲擊損毀邊境哨站同一座海上鑽油平台；約旦有三枚導彈落入境內，造成輕微損毀但無人傷亡；阿曼東北部多處遭無人機襲擊後，開戰以嚟首次召見伊朗大使抗議，斥其行為「不負責任」；阿聯酋一度響起警報，惟當局稱冇導彈進入領土。

呢條戰前承載全球約五分一石油及天然氣貿易嘅水道，而家再陷各說各話局面：伊朗話船隻「唔可能通行」，美方堅稱海峽照常開放，但追蹤數據顯示交通量已跌至極低水平。油價戰時一度高見每桶120美元（約936港元），近日隨局勢惡化反彈，布蘭特期油上周五收報約76美元（約593港元），一周累升約半成。

政局方面，自2月28日開戰以嚟一直未露面嘅伊朗新任最高領袖穆傑塔巴，喺父親哈梅內伊葬禮後首度發聲，誓言為父親喺開戰首輪空襲中被殺一事復仇，形容呢件事「係國家嘅意志，必須堅決執行」。另有美國官員匿名透露，伊朗強硬派內部一個「流氓派系」蓄意破壞停火，德黑蘭就堅稱政權團結一致。聯合國秘書長古特雷斯 (António Guterres) 警告，重返全面戰爭將帶嚟「災難性後果」，促各方即時停手；據報巴基斯坦、卡塔爾同埃及等斡旋方周日仍繼續努力。