人工智能正式殺入法庭，仲要贏咗。英國旺茲沃思郡法院（Wandsworth County Court）5月14日經過三個鐘審訊後裁定，由全球首間受監管AI律師行Garfield AI協助嘅自由工作者塔基迪爾（Tamires Camal Taquidir）勝訴，成功追回7,000英鎊（約7.4萬港元）欠款，被告提出嘅反申索亦一併被駁回。呢單案被視為全球首宗喺受監管AI律師支援下打贏嘅正式庭審，法律科技界形容係歷史性時刻。

案情講返，塔基迪爾為一間餐飲款待業公司提供人力資源服務後被拖數，多次追討不果，於是用Garfield AI平台生成訴前信件、入稟法院；對方隨即聘請事務律師應戰，仲反申索想施壓。AI平台一手包辦文件披露、四份證人陳述書同審訊文件冊等庭前工作，去到開庭先委聘One Essex Court初級大律師李（Dominic Li）出庭陳詞。最終原告只係畀咗大約400英鎊（約4,200港元）AI服務費，就擊敗咗出齊律師加大狀嘅被告。

Garfield AI去年5月成為全球首間獲事務律師監管局（SRA）批准以AI提供法律服務嘅律師行，由前倫敦訴訟律師菲臘・楊（Philip Young）同量子物理學家丹尼爾・朗（Daniel Long）創辦，主攻英格蘭小額追數案，一封追數信收2英鎊（約21港元），起草入稟文件50英鎊起。平台成立一年多已處理超過600宗申索，為用戶追回或和解超過50萬英鎊（約530萬港元），涉案金額由30至1萬英鎊不等。

行政總裁楊話，好多企業以往因為打官司貴、慢、壓力大而被迫撇賬，今次證明AI冇取代法官、大狀或者法律制度，而係令有理據嘅索償人真係行得到落法庭；技術總監朗就強調，呢啲唔係噱頭，亦唔係要取代律師，而係畀普通人同小企業有工具維護權利。事主亦透露，對方反申索原意係想嚇退佢，但有低成本又有質素嘅支援，佢先至捱得到落去。

不過AI喺法律界並非一帆風順：英國律師行Pinsent Masons早前因為向法庭提交含虛假法律資訊嘅AI信件，被高等法院法官批評；美國老牌律師行Sullivan & Cromwell 4月亦要為破產案文件多處AI「幻覺」道歉。相反，英國上議院憲制委員會喺研究司法可及性嘅報告入面，引用Garfield做負責任應用AI嘅範例；業界同時倡議設立AI文件披露義務，防止有人用平價AI濫發訴狀癱瘓法庭。