北約32國領袖一連兩日喺土耳其首都安卡拉舉行年度峰會，聯盟接連公布總值數以百億美元計嘅軍購項目，力證盟友正兌現去年海牙峰會「2035年前國防開支達GDP百分之5」嘅承諾，藉此安撫美國總統特朗普。不過特朗普甫抵埗即再度發難，堅稱丹麥自治領土格陵蘭「應該由美國控制，而唔係丹麥」，又重提島嶼被中俄船隻「包圍」，直言格陵蘭問題「損害咗我同北約嘅關係」，甚至揚言美國可以撤走全部駐歐美軍。丹麥首相弗雷德里克森(Mette Frederiksen)隨即喺安卡拉強硬回應，指美國想吞併格陵蘭嘅立場人所共知，「但我希望大家同樣清楚：呢件事唔會發生」；格陵蘭外長埃格德(Múte Egede)亦強調，島嶼前途過去、將來都只能由格陵蘭人自己決定。

東道主土耳其就成為峰會大贏家。特朗普同總統埃爾多安(Recep Tayyip Erdogan)會面後宣布，將解除因土方2019年購入俄製S-400防空導彈系統而實施嘅制裁，並考慮恢復出售F-35戰機，形容兩人之間「有一種化學作用」。以色列總理內塔尼亞胡(Benjamin Netanyahu)即時反對，警告此舉會危及以國安全；而根據美國法律，土耳其只要繼續持有S-400，重返F-35計劃仍有重重關卡。

軍購方面，北約秘書長呂特喺防務工業論壇一口氣公布多項大計：聯盟將同瑞典紳寶(Saab)展開談判，聯合採購最多10架GlobalEye預警機，取代1982年起服役至今嘅波音E-3A機隊；英國、法國、土耳其等7國組建空中巴士(Airbus)A400M運輸機隊；德國、丹麥、芬蘭、挪威4國採購最多5架MQ-4C Triton無人偵察機；未來5年再投放逾400億美元(約3,120億港元)發展反無人機能力。北約同時啟動12國參與嘅國防關鍵原材料倡議，減低軍工供應鏈對俄羅斯同中國嘅依賴；部分項目將動用歐盟最多1,700億美元(約1.33萬億港元)低息國防貸款。美國駐北約大使就透露，盟友一年間新增近1,390億美元(約1.08萬億港元)軍費，約一半會用嚟購買美製武器。

烏克蘭總統澤連斯基則再度爭取入盟，聲稱烏軍每月平均「消滅」3萬名俄軍，實戰經驗足以強化北約防衛。佢今日下午會同特朗普會面，商討加快取得愛國者攔截導彈；峰會宣言預料會承諾2026至2027年每年向烏克蘭提供700億歐元(約6,400億港元)軍事援助。峰會場外，伊斯坦布爾同安卡拉均有數以千計民眾示威反對北約，警方拘捕多人。