越南喺國土最南端嘅金甌省，正日以繼夜趕建全國最長跨海大橋。呢條全長18公里嘅大橋，連接大陸同細小嘅鴻快島，係總投資近40億美元（約312億港元）軍民兩用深水港及交通走廊項目嘅核心，目標將湄公河三角洲直接駁通泰國灣嘅國際航線。彭博社報道指，對河內嚟講，呢場基建豪賭唔單止係經濟盤算，更加係回應北京喺鄰國柬埔寨影響力急速擴張嘅戰略部署。

項目由越南國防部主導，第十二軍團負責施工，去年8月動工，單係大橋造價已達25.7萬億越南盾（約78億港元）；連同80公里長嘅高速公路，預計2028年底至2029年上半年陸續落成。鴻快島深水港設有1,000米泊位，年吞吐量2,000萬噸，可以停泊載重高達25萬噸嘅巨型散貨船同油輪，遠期規模達686公頃，建成後將躋身東南亞最長跨海大橋三甲。

河內一路睇住中柬關係越行越密。中國出資升級嘅柬埔寨雲壤海軍基地去年已經完工啟用；由中企承建、連接金邊同泰國灣嘅180公里德崇扶南運河，今年4月11日亦已開展第二期工程。越南憂慮柬埔寨日後繞過其港口同水道出海，經濟槓桿隨時流失。新加坡尤索夫伊薩東南亞研究院學者黎洪和形容，鴻快島項目「與其話係經濟押注，不如話係地緣政治對沖」。彭博經濟研究分析員法拉爾 (Adam Farrar) 更加指，項目一旦落成，越南可以喺傳統上只靠細型巡邏艇撐場嘅海域維持大型戰艦運作，係數十年嚟海軍態勢最重大嘅轉變之一。

越共總書記蘇林去年11月視察時，將鴻快島定性為「國家戰略要地」；總理范明政12月底再落區督工，仲要求喺大橋加設觀景停靠位，順道發展旅遊。面對中國約2,500億美元（約1.95萬億港元）嘅國防開支，越南軍費只係對方二十分之一左右，硬撼唔到就靠基建落子威懾，據彭博行業研究估算，越南國防預算到2031年將升至204億美元（約1,590億港元）。新南威爾士大學學者阮世芳直言，越南實際上係想將呢片海域打造成「海上堡壘」。

中國外交部回應時強調，同任何國家發展友好合作「都不針對第三方」；柬埔寨副首相孫占托 (Sun Chanthol) 亦否認運河涉及軍事用途，斥有關講法毫無道理。不過對全國最貧困省份之一嘅金甌嚟講，項目意義好實在：當地定下2030年前年均增長超過一成嘅目標，遠高於過去五年約7%嘅增速，跨海大橋一旦通車，呢個一度俾後生仔認定遲早要離開嘅偏遠角落，命運或者就此改寫。