全球記憶體晶片短缺持續惡化之際，半導體產業協會SEMI聯同全球三大記憶體製造商，正式去信美國政府高層，警告華府若試圖干預市場價格或產能分配，唔單止解決唔到問題，反而可能令供應緊張局面進一步惡化。

據彭博社取得嘅信件副本顯示，SEMI喺7月1日致函財政部長貝森特、國防部長赫格塞斯、商務部長盧特尼克以及國務卿魯比奧，明言「針對性政策雖然有助加快國內供應鏈韌性，但扭曲定價或產能決策嘅干預措施，將有延長需求低迷嘅風險」。SEMI成員涵蓋美國美光、韓國三星及SK海力士三大記憶體巨頭，連同台積電、英特爾等超過三千間半導體企業。

今次去信嘅導火線，係俄亥俄州共和黨參議員莫雷諾 (Bernie Moreno) 早喺4月已經去信盧特尼克，要求政府優先保障美國汽車業嘅記憶體晶片供應，仲警告短缺隨時重演疫情期間供應鏈斷裂嘅慘況。SEMI今次表態正正係對呢類干預主張嘅正面反擊，協會建議政府唔好直接落場，反而應該同國會合作，向消費電子產品提供稅務抵免或扣減，抵銷手機同手提電腦加價嘅壓力，並延長鼓勵美國本土擴產嘅稅務優惠。

值得留意嘅係，SEMI嘅取態同蘋果公司嘅遊說策略南轅北轍。蘋果自5月起積極遊說白宮，希望獲准向被五角大樓列入黑名單嘅中國記憶體廠長鑫存儲採購晶片，行政總裁Tim Cook更加親自向貝森特陳情。蘋果上月25日已經被迫上調Mac同iPad等產品售價，加幅由100至500美元（約780至3,900港元）不等，庫克坦言今次記憶體價格飆升，係佢入行40年嚟前所未見。

供需失衡短期內難以扭轉。SEMI預計全球記憶體產能每年增長約19%，但喺AI數據中心需求強勁帶動下，需求增速更快，三星同SK海力士均預警短缺可能持續到2027年甚至更耐，有市場研究更估計，2026年全球記憶體產量高達七成會被數據中心吸走。消費市場首當其衝，唔少用家轉買較平嘅DDR4記憶體頂住先，廠商甚至重啟DDR4生產線。研究機構Omdia數據顯示，美國今年首季PC出貨量按年跌7%，係近三年最大跌幅，全年料萎縮14.4%，當中500美元以下嘅平價機種出貨更大跌近19%。Gartner則預測，到今年年底DRAM連同SSD價格將較2025年急升130%，平價電腦時代恐怕一去不返。