中國解放軍海軍一艘核動力潛艇喺昨日中午12時01分，向南太平洋公海發射一枚搭載訓練模擬彈頭嘅潛射戰略導彈。海軍新聞發言人王學猛表示，導彈準確落入「指定海域」，強調今次試射係年度軍事訓練嘅例行安排，事前已通報相關國家，符合國際法同慣例，唔針對任何特定國家同目標，但通報無交代落點位置。今次係中國首次公開承認向太平洋試射潛射戰略導彈。

中方無公布導彈型號，解放軍現役有巨浪-2同巨浪-3兩款潛射彈道導彈，後者由中國近海發射已足以打到美國本土，外界普遍相信今次試嘅係2025年「九三閱兵」亮相嘅巨浪-3（JL-3）。導彈射程大概率超過8,000公里，證明解放軍海基核力量可以喺太平洋公海任意點位實施戰略反擊。美國明德學院學者劉易斯（Jeffrey Lewis）就指出，中國以往甚少試射洲際導彈，如今明顯改行「多測試」策略，願意為此承受政治代價。對上一次要數到2024年9月，中國由海南發射東風-31B洲際導彈，飛行約11,000公里落入法屬波利尼西亞附近水域，嗰次已經係自1980年以嚟首次喺國際水域試射。

今次導彈落入1986年《拉羅湯加條約》劃定嘅南太平洋無核區，中國1987年已簽署條約相關議定書。新西蘭外長彼得斯（Winston Peters）批評，中方通知後幾個鐘就發射，形容做法令人深感憂慮，強調「區內國家唔應該坐視呢類試射變成常態或者例行公事」，又話唔想見到中國將南太平洋當成導彈試驗場。澳洲外長黃英賢確認事前接獲通報，但批評試射對區域構成不穩定因素，反映中國急速擴軍但欠缺透明度同意圖保證。日本事前已「強烈敦促」北京重新考慮，事後對中國愈趨活躍嘅軍事活動表達嚴重關切；日本海上保安廳周日仲接獲中方通知，指可能有殘骸落入日本專屬經濟區。

試射時機亦惹人聯想。同日，澳洲總理阿爾巴尼斯同斐濟總理拉布卡（Sitiveni Rabuka）喺蘇瓦簽署《和平之洋聯盟》共同防禦條約，係斐濟史上首份、澳洲第四份軍事同盟；雙方另簽經濟條約，澳洲承諾十年內投資逾10億澳元（約54億港元），外界視之為抗衡中國喺太平洋影響力嘅部署。黃英賢被問到中方係咪特登揀呢日射彈，只回應「留返畀中國自己解釋佢嘅意圖」。同一日，中俄「海上聯合-2026」演習喺青島軍港開鑼，演習去到7月13日，俄方派出「瓦良格」號導彈巡洋艦、「烏法」號潛艇等艦艇，演習結束後兩軍仲會喺太平洋相關海域聯合巡邏，惟暫時未知今次試射同軍演有無直接關連。

據五角大樓去年底報告，中國2024年已擁有約600枚核彈頭，2030年前有望突破1,000枚；解放軍現時有六艘094型戰略核潛艇。6月時，亦有披露嘅新西蘭軍方內部文件更警告，北京喺太平洋嘅海軍行動同導彈試射，恐怕會成為「持續性」現象。