南韓三星電子今日（7日）公布第二季初步業績，交出一張史無前例嘅成績表：4至6月收入171萬億韓元，營業利潤89.4萬億韓元，較去年同期暴升1,810%，折合約4,560億港元，即係一年之間翻咗成19倍，仲高過市場預期約85萬億韓元嘅共識，連續兩季刷新歷史紀錄。呢個數字一舉打破Nvidia今年2至4月季度創落嘅535億美元（約4,180億港元）紀錄，令三星成為全球史上單季營業利潤最高嘅科技企業；放眼所有行業，歷來據報只有沙特國營石油公司阿美2022年油價高峰期嘅單季數字高過呢個水平。

今季業績有幾誇張？單一季賺嘅錢，已經係2025年全年營業利潤43.6萬億韓元嘅兩倍有多，甚至多過2023至2025三年嘅利潤總和。裝置解決方案（DS）部門總裁金容寬（Kim Yong-kwan）上星期五（3日）早有預告，佢喺內部員工大會放話，指公司2026年嘅利潤將超越三星投身半導體行業約40年嚟賺落嘅總和，市場普遍預期全年營業利潤達300萬億韓元，折合約2,000億美元、即逾1.5萬億港元「一年賺過晒40年」喺AI記憶體超級週期下真係做得到。

暴利根源係記憶體晶片瘋狂加價。三星首季已將DRAM價格較去年第四季調高約九成，第二季DRAM同NAND合約價再跳升四至六成半，而家仲同客戶傾緊第三季再加最少兩成；12GB LPDDR5X合約價自2025年首季起累計升約三倍，近期見每顆145美元、約1,130港元。更加要留意嘅係，89.4萬億韓元其實仲係「打咗折」嘅數字：三星5月同工會達成協議，DS部門要按營業利潤嘅10.5%預留特別花紅，券商估計今季已撥備近20萬億韓元，撇除呢筆使費，實際單季利潤已突破100萬億韓元大關。

不過破紀錄業績出爐後，三星股價今早反而急插逾5%，一度低見30萬韓元，分析認為利好因素早已反映喺股價，投資者趁勢獲利回吐。另一個諷刺位係，晶片部門賺到笑，三星自己手機部門就因為核心零件成本急升至佔整機成本超過四成，內部已警告今年隨時錄得部門史上首次年度虧損。至於貴價潮幾時完？南韓總統李在明上月底聯同三星、SK海力士公布800萬億韓元、折合逾4萬億港元嘅擴產大計，喺西南部起四座新廠，目標五年內令DRAM產能倍增，但起一座記憶體廠動輒三至五年，遠水難救近火。券商更預期三星第三季營業利潤上望110萬億韓元，即係話只要AI需求唔冧，消費者買手機買電腦，恐怕仲要焗住捱貴一排。