美國上星期六（7月4日）迎嚟立國250周年，總統特朗普喺華盛頓國家廣場發表壓軸演說，形容呢一刻係「有史以來最歡欣、最光輝嘅里程碑之一」。不過，歷代總統一向視國慶為放低黨爭、凝聚全國嘅時刻，今次演說就黨派色彩濃烈，由催迫國會通過選舉法案，到將「共產主義」描繪成頭號內敵，令唔少學者同民眾質疑：呢場國家生日會，慶祝嘅究竟係美國精神，定係一場提早開鑼嘅中期選舉造勢？

特朗普演說中聲言，美國戰士喺世界各地戰場對抗共產主義，唔係為咗俾呢個威脅喺本土死灰復燃，仲形容共產主義「好似癌症，一定要切除」；有評論解讀呢啲言論係衝住民主黨嚟，為11月中期選舉鋪路，因為民主社會主義派候選人早前先至喺紐約同科羅拉多州選舉報捷。佢喺國慶前夕嘅總統山演說更加話共產主義係「美國自由嘅致命威脅」，比一戰、二戰、珍珠港甚至911更大，有指呢種調子令人想返起美國史上最黑暗嘅章節之一即係麥卡錫年代嘅獵巫陰影。佢又再力推《拯救美國法案》（SAVE America Act），呢條要求選民出示公民身份證明嘅法案6月初已經喺參議院闖關失敗，批評者如布倫南司法中心更直指，法案一旦通過會係國會史上最辣嘅限制投票法例，隨時令數以百萬計美國公民投唔到票；喺慶祝「人人生而平等」嘅《獨立宣言》250周年當日力推咁嘅法案，被輿論指極具諷刺。

更深層嘅爭議在於整個慶典嘅操盤。親白宮嘅「自由250」團隊架空咗2016年成立嘅跨黨派籌備機構，國家廣場大範圍圍封做博覽會，場內有保守派團體同軍工企業攤位，多個民主黨執政嘅州拒絕派代表團，唔少表演者亦退出，樂隊Poison主音米高斯（Bret Michaels）直言活動「已經演變成遠比我當初答應嗰陣更分化」；政府仲推出印有特朗普個人照片嘅新版護照。有美國民調顯示，大多數美國人，包括四分三民主黨人同一半共和黨人，都認為250周年活動已經太政治化。更有`學者指：即興造勢大會係為現場觀眾而設，同一篇要向全國人民發表嘅周年演說，根本係兩件事。

副總統萬斯同日喺紐約港軍艦基爾薩奇號（USS Kearsarge）上發言，批評有「一小撮但好大聲」嘅聲音，執迷於講美國嘅缺點而唔係佢嘅偉大。但有學者提醒，由1852年廢奴領袖道格拉斯（Frederick Douglass）嘅國慶演說開始，美國一直係一個不斷辯論自身歷史同身份嘅國家，自我批判正正係立國精神嘅一部分，將批評者打成敵人，本身就同呢種傳統背道而馳。紐約市長曼達尼（Zohran Mamdani）冇點名特朗普，但話立國理念「強大到足以捱得過任何威權政權——前提係我哋肯伸手去攞」。