纏繞八年嘅Google Android 反壟斷案終於塵埃落定。歐盟最高司法機構歐洲法院周四（7月2日）駁回Google及母公司Alphabet嘅終極上訴，裁定維持41.25億歐元、折合約370億港元嘅天價罰款，確認Google濫用Android 系統嘅市場主導地位。今次屬終審裁決，Google再無任何上訴途徑，呢張歐盟史上最高嘅反壟斷罰單正式落實。

案件源於2018年，歐盟委員會當年指控Google利用Android 嘅壟斷地位，強迫手機生產商若想預裝Google Play商店，就必須同時預裝Google搜尋同Chrome瀏覽器，又透過「反碎片化協議」禁止廠商出售未經Google批准嘅Android 分支版本，藉此鞏固自家搜尋霸權，於是開出43.4億歐元罰單。歐盟普通法院2022年維持大部分裁定，惟因部分收入分成協議嘅指控不成立，將罰款下調至41.25億歐元。Google不服，再上訴至盧森堡嘅歐洲法院，但法院今次全面駁回，指普通法院正確評估咗有關協議嘅反競爭效果，並認同用戶對預裝應用程式存在「維持現狀偏好」，令對手難以突圍。

Google回應判決時堅稱，Android 為所有人提供更多選擇，支持住成千上萬間企業，批評判決無視公司為維持Android 開放、互通同免費所作嘅重大投資，並強調早喺2018年已按原判調整協議。呢間科技巨企過往仲反擊過，指歐盟對蘋果公司 (Apple) 喺iPhone上力推自家服務嘅做法視而不見，質疑執法雙重標準。判決公布後，Alphabet股價喺美股盤前一度跌約1%。

事實上，今次只係Google同布魯塞爾連場官司嘅其中一役。計及2017年購物比價案、2019年網上廣告案，以及去年9月廣告科技案嘅29.5億歐元罰款，歐盟過去十年對Google開出嘅反壟斷罰單累計近110億歐元，折合約980億港元，直逼千億大關，當中廣告科技案Google仍然以十七項理由上訴抗辯。

更令Google頭痛嘅係，歐盟依家仲手持《數字市場法》(DMA) 呢件新武器。委員會今年1月已就Android 同搜尋數據展開規範程序，要求Google開放Android 底層功能，畀ChatGPT、Claude等對手嘅AI助手享有同自家Gemini同等嘅系統權限，仲要向競爭對手分享匿名搜尋數據，最終約束性決定將於7月27日前出爐，一旦唔合規，罰款上限可達全球年收入一成。

歐美角力更為事件添上火藥味。美國總統特朗普今年1月已喺Truth Social發文，狠批歐盟對美國科技公司嘅罰款「非常不公平」，並多次威脅以關稅報復。分析認為，今次終審裁決為歐盟競爭事務專員里貝拉 (Teresa Ribera) 領軍嘅監管行動注入強心針，布魯塞爾今年鐵定加強執法，鎖定Google、Meta、蘋果等巨頭，同華府嘅新一輪科技監管風暴，恐怕一觸即發。