ChatGPT開發商OpenAI已就向美國政府交出5%股權嘅方案，同華府展開初步討論。以OpenAI今年3月完成破紀錄融資後8,520億美元（約6.6萬億港元）嘅估值計算，呢批股權市值高達426億美元（約3,320億港元）。行政總裁阿爾特曼 (Sam Altman) 據報認為，畀公眾直接分享OpenAI嘅財務權益，係全民共享人工智能紅利嘅最佳方法。

報道指，阿爾特曼同OpenAI多名高層建議，美國各大領先AI企業應各自撥出5%股權，注入一個類似阿拉斯加永久基金嘅機構持有；該基金以州內石油財富投資，每年向居民派發股息，截至今年3月底基金總值約863億美元（約6,730億港元）。換言之，Anthropic、Google同Meta等對手都會被納入呢個「全行科款」框架，但暫時未有任何一間公司表態會跟隨，OpenAI拒絕回應報道，白宮亦未有即時回覆。知情人士又透露，有關商討目前仍屬概念階段，真係要落實嘅話，隨時需要國會立法通過。

阿爾特曼已就方案直接同總統特朗普、商務部長盧特尼克及財政部長貝森特商討，近幾星期仲同左翼獨立派參議員桑德斯 (Bernie Sanders) 會面。特朗普上月已表明，政府入股AI巨企係「一件美事」，可以令美國人成為「呢場革命嘅合夥人」；副總統萬斯就話，總統傾向畀民眾持有股權，多過直接派現金。

不過，桑德斯開出嘅價碼遠比阿爾特曼進取。佢上月提出《美國AI主權財富基金法案》，要求對年收入逾2億美元嘅大型AI企業一次過徵收50%股票稅，按現時估值成立一個高達7萬億美元（約54.6萬億港元）嘅主權基金，每年派息可向每名美國人發放逾1,000美元（約7,800港元）。桑德斯批評阿爾特曼嘅5%方案只係「溝淡版」，同真正公眾擁有權相距甚遠；阿爾特曼就向桑德斯表明，認同公眾應該喺AI公司持有股權，但50%咁高嘅比例佢冇可能接受。

分析認為，OpenAI今次「主動獻股」，多少同華府近期收緊監管有關。OpenAI日前先至應政府要求，押後全面推出新模型GPT-5.6；Anthropic嘅Claude Fable 5同Mythos 5模型上月亦一度因美國史上首次針對AI模型嘅出口管制而全球停用，日前先恢復服務。至於政府入股私企，喺特朗普任內早有先例，聯邦政府去年8月斥資89億美元（約673億港元）入股晶片巨頭英特爾，取得約一成股權。而OpenAI早喺4月已倡議設立「公共財富基金」，畀每一名冇投資股票市場嘅公民都可以分享AI帶動嘅經濟增長，Anthropic據報亦正研究以AI行業稅收作財源、向民眾發放「數碼股息」嘅構思；而兩間公司近期先後以保密方式向美國證交會遞交上市申請，估值分別達8,520億同9,650億美元，一旦成功掛牌，華府手上嘅AI股權隨時水漲船高。