美國同以色列對伊朗開戰以嚟，平民傷亡最慘重嘅一擊，死者大多數係學童。美聯社周四發表深度調查，重組今年2月28日美軍導彈擊中伊朗南部米納布（Minab）一間小學嘅始末：事發至今超過120日，華府仍未正式認責，五角大廈份調查報告更加只聞樓梯響，過百個破碎家庭連一句交代都等唔到。

2月28日係齋戒月期間嘅上課日，喺霍爾木茲海峽附近嘅米納布，數百名學童如常返到名為「沙賈雷·泰耶貝」（Shajareh Tayebeh，波斯語解「好樹」）嘅小學。上午9時40分左右，教職員接獲德黑蘭遇襲消息，即刻用固網電話通知家長接仔女；10時15分，國家傳媒宣布全國停課，但為時已晚——多枚彈藥隨即命中校園，至少五座建築被夷平。有居民憶述，一名爸爸接走個仔十分鐘後就聽到巨響，趕返現場只能喺瓦礫堆認屍；救援人員喺廢墟搵到細小嘅書包、兒童畫作，仲有一隻懸喺瓦礫之間嘅小手臂。

當日醫院醫生已點算到至少108具遺體，官方其後公布死者達168人。倫敦獨立監察組織Airwars核實咗157名死者身份，當中123人係13歲或以下嘅兒童，34名成人包括26名教職員（一人懷孕）同5名家長。導彈殘骸相片、衛星圖像同片段分析，一致鎖定兇器係美軍「戰斧」（Tomahawk）巡航導彈；有軍備專家直言，今場戰事得美國一方使用戰斧，想卸膊都難。

更令人齒冷嘅係，知情美國官員透露，軍方幾乎即時已掌握學校中彈嘅證據；早喺七年前已有分析員確認該建築係學校，只係情報從無喺部門之間流通，負責鎖定目標嘅人員根本唔知自己瞄準緊課室，間學校十幾年前先由隔籬革命衛隊基地圍牆劃出，初步調查認為過時情報好可能就係肇因。報道又踢爆，防長赫格塞斯（Pete Hegseth）上任後大幅裁減國會設立、專責防止誤炸平民嘅五角大廈辦公室，令列明醫院學校嘅「禁擊名單」停止更新；120名民主黨議員仲去信追問，揀目標過程有冇用過人工智能、有冇經人手核實。

儘管初步評估早已認定美方要負責，總統特朗普上星期仍話未睇過報告，堅稱「當時導彈周圍飛」、「我唔認為係我哋」；赫格塞斯就話報告會喺「合適時機」公布。調查已進入最後審核階段，但國會愈嚟愈擔心白宮會將結果列做機密，真相隨時石沉大海，對比2021年美軍喺喀布爾誤殺10名平民，五角大廈不足一個月已認責。

另一邊廂，德黑蘭政權亦被轟攞慘劇做「政治提款機」：死難學童被封做「烈士」，家長被要求出席集體喪禮；伊朗隊出戰世界盃，褸上佩戴金色「#168」徽章，連談判代表團都自稱「米納布168」。國際特赦組織直斥當局利用家屬傷痛做宣傳，加上封網同拒外媒入境，令獨立查證難上加難。

呢場由2月底打到4月初嘅空襲戰，官方數字指至少造成2,362名平民死亡，當中383人係兒童。隨住特朗普同伊朗總統佩澤希齊揚（Masoud Pezeshkian）上月17日簽署備忘錄、展開60日停火談判，戰火暫時止住，但雙方近日仍互有攻擊，米納布呢筆帳注定係和談上空嘅計時炸彈。共和黨參議員朗茲（Mike Rounds）講得白：國會攞唔到足夠資料，佢要一份完整報告，因為呢個問題「唔會自己消失」。