最近，美國紐約市民主黨市長初選，由民主社會主義派候選人勝出，引起全國關注。特朗普隨即猛烈反擊，形容對方係「無神論共產黨人（Godless Communists）」，更話左翼已經成為美國立國二百五十年以來最大威脅。

另一邊，共和黨亦出現同樣現象。經過幾年發展，特朗普支持嘅MAGA派，基本上已經主導共和黨。過去嗰批建制共和黨人物，不少喺初選被淘汰或者被邊緣化。好多人以為，美國問題係民主黨愈來愈左。

其實唔係。真正發生緊嘅，係民主黨愈向左，共和黨愈向右，雙方互相推動，美國政治開始愈來愈兩極化。但究竟乜嘢叫兩極化？乜嘢先叫真正嘅社會分裂？好多年前，我返去聖保羅書院演講，曾經講過一個觀點。

社會分裂，唔係有人支持左，有人支持右。民主社會一定有不同意見。真正嘅社會分裂，係雙方都相信自己喺道德上係正確，而對方喺道德上係邪惡；自己代表正義，對方代表邪惡；自己可以存在，而對方最好消失。去到呢一步，政治已經唔再係討論政策，而係開始變成敵我鬥爭。

民主點解可以存在？其實答案好簡單。民主就係人類發明出嚟，用嚟代替戰爭嘅制度。以前一個國家有分歧，就打仗。邊個打贏，邊個話事。民主就係話：唔好再打仗，我哋改用選舉。我成日用踢足球做比喻。大家有分歧，就唔好打交。我哋踢一場波。大家事前同意同一套規則，同一個球證，同一個賽制。輸咗，下一次再踢。

民主最重要嘅唔係贏家。而係輸家願意接受結果。如果輸咗嗰隊衝入球場，話球證無效、賽果唔算數，甚至開始打交，咁仲踢乜嘢波？直接打交咪得囉。所以，民主真正存在嘅基礎，從來唔係投票，而係大家願意接受自己有可能會輸。

咁點解人類會慢慢失去呢種能力？因為人有一個很基本嘅天性。我哋會保護自己人。同一個群體入面，大家合作、生存，唔會隨便互相殺害。但如果要對另一班人使用暴力，人首先要做一件事。就係唔再將對方當成自己人。開始相信，對方唔係同自己生活喺同一個共同體，而係敵人。於是，就開始出現各種標籤。

共和黨話民主黨係共產黨人、無神論者。民主黨又將MAGA一律視為法西斯、種族主義者。呢啲標籤真正作用，唔係分析對方。而係取消對方作為合法政治對手嘅資格。一旦對方變成邪惡，一旦對方變成敵人，你就唔再接受佢有權贏。

民主亦開始失去存在嘅基礎。美國歷史其實已經試過。第一次，就係南北戰爭。雙方已經唔接受對方代表嘅美國可以繼續存在，最後用戰爭解決問題。第二次，就係越戰年代。社會嚴重撕裂，反戰、種族衝突、街頭暴力此起彼落，國家幾乎陷入內戰邊緣，最後連時任總統詹森都放棄競逐連任。

點解人類會有去人性化呢套機制？因為人類本身有一個很矛盾嘅天性。一方面，人類要合作先可以生存。一個群體如果成員日日互相殘殺，呢個群體好快就會瓦解。所以人類慢慢建立咗一套本能同道德禁制：唔好殺自己人，唔好任意傷害同一個共同體入面嘅人。能夠壓低內部暴力嘅群體，生存機率自然較高。

但另一方面，人類亦有攻擊性，尤其年輕男性之間，競爭、地位、資源、性衝動、雄性荷爾蒙，都容易造成內部衝突。任何群體都要處理呢股能量。其中一個最古老嘅方法，就係將衝突向外轉移。將外部群體定義成敵人，將內部矛盾轉化成對外敵意。當大家相信有一個外部敵人威脅自己，內部就容易重新團結。

但要做到呢一步，首先就要否定對方係「人」。如果對方都係人，殺佢就會有道德負擔；如果對方係野蠻人、異類、怪物、害蟲、叛徒、邪惡力量，暴力就容易被合理化。所以政治暴力真正危險嘅第一步，唔係有人拎起武器，而係有人開始用語言，將另一群人逐步排除出「人」同「共同體」之外。

一旦對方唔再被視為同一個community入面嘅人，暴力就會由罪惡，慢慢變成正義。而家，好多人認為，美國正面對第三次同樣嚴重嘅政治撕裂。我唔敢講一定會去到嗰一步。但真正值得擔心嘅，唔係特朗普講得幾激烈，亦唔係左翼贏咗一場初選。

而係愈來愈多美國人開始相信：如果對方贏，美國就完。當一個社會人人都咁相信，民主就開始變質。因為民主唔係保證你永遠贏。民主真正要求嘅，只係一件事——即使你極之討厭對方，你仍然承認佢有權參選，有權勝出，有權依法執政。

真正保護民主嘅，從來唔係勝利者。而係輸咗嗰一方，仍然願意接受制度，等待下一次再競爭。如果有一日，大家都唔再接受對方可以勝利，咁民主就唔再係和平解決衝突嘅制度，而會慢慢退化返人類最古老嘅方法——用力量，而唔係用選票，去決定誰可以統治。