美國對伊朗連續13晚嘅轟炸行動暫告停頓。美軍過去兩晚冇再發動新一輪空襲，五角大樓消息人士己經證實行動已「暫時擱置」。軍方原已呈交第14晚嘅打擊方案連同進一步升級嘅選項，但特朗普拒絕放行。消息指，副總統萬斯同參謀長聯席會議主席凱恩上星期五（24日）喺白宮會議上，先後對戰事升級表達憂慮；凱恩更明言，美軍「愛國者」攔截導彈同其他彈藥庫存消耗嚴重，一旦擴大攻勢隨時見底。白宮就未有證實暫停空襲嘅實際原因。

特朗普同日被問到退場策略時話，美國有兩條路：「可以照而家咁一件一件咁拆解佢哋，甚至加快步伐；又或者同佢哋談判，兩樣嘢我哋而家都做緊。」佢形容伊朗「一日比一日認真」，只係未準備好達成協議。白宮通訊總監張又晉補充，連續13日打擊加上制裁已令伊朗經濟陷入癱瘓，「識做就應該傾返個協議，否則佢哋知道會有咩後果」。

外交戰線同步升溫。阿曼副外長級代表團上星期五起一連兩日訪問德黑蘭，伊朗外交部星期日表示，雙方已就霍爾木茲海峽安全通航嘅「共同原則同操作機制」交換意見，形容會談有進展，技術同政治磋商將會繼續。CBS引述兩名地區官員指，美方停炸正正係為咗唔打亂呢場敏感斡旋；有參與調解嘅官員透露，華府同德黑蘭都有意重返6月簽署嘅臨時停火協議，折衷方案圍繞交由伊朗管理海峽通航，但要放寬對船隻嘅限制。伊朗軍方星期日就話，美方收手兩晚後，伊朗亦暫停報復性攻擊，但警告美軍一旦復炸，戰事只會進一步擴大。

不過海上攻防未有停過。美軍中央司令部重申，對伊朗港口嘅海上封鎖「仍然有效」，並喺上星期五喺阿曼灣制服一艘企圖衝關嘅莫桑比克旗油輪；革命衛隊就聲稱星期六攔截4艘「未經授權」過海峽嘅船隻，星期日再指過去24小時鳴槍截停多6艘，說法未經獨立核實。紅海方面，也門胡塞武裝聲稱星期六以導彈同無人機襲擊沙特阿美位於吉贊同延布嘅設施，報復沙特空襲荷台達港，衛星圖像顯示吉贊煉油廠起火，沙特暫未證實損毀。布蘭特期油上星期四收市重上每桶100美元，較2月底開戰前累升近四成。呢場星期二就滿5個月嘅戰爭令美國汽油價格高企，共和黨11月中期選舉選情受壓，特朗普堅稱唔會急於求成，「選舉嘅事自有分曉」。以色列總理內塔尼亞胡下星期到訪華盛頓，被視為左右戰局嘅下一個變數。