台灣據報正考慮進一步收緊對中國大陸銷售人工智能晶片嘅出口管制，將限制範圍由個別列入黑名單嘅企業，擴展至中國境內所有相關客戶。新制度如果落實，可能令台灣執法部門可以更直接引用出口管制規例，追究涉嫌將先進AI晶片或者伺服器轉運到中國嘅人士刑責，而唔需要主要依賴虛假報關、偽造文件或者走私等其他罪名處理案件。

今次討論嘅背景，係華盛頓愈來愈擔心搭載NVIDIA高階晶片嘅人工智能伺服器，經第三地轉運或者透過境外子公司流入中國。美國由2022年開始逐步限制向中國出口先進AI晶片，理由係防止相關算力被用於軍事、情報或者其他國家安全用途。特朗普政府喺5月底再發出指引，釐清即使中國企業將子公司設喺馬來西亞等第三地，購買受管制高階晶片仍然需要取得許可證。

台灣近期亦已經展開具體執法行動。基隆地檢署5月表示，正調查3名涉嫌以虛假文件出口高階AI伺服器嘅人士。涉案伺服器由美超微生產，內含NVIDIA晶片，原本受到美國出口限制，禁止銷往中國大陸、香港同澳門。檢方指，涉案人士涉嫌為咗取得巨額非法利益，喺台灣購入伺服器後，以不實文件申報出口；海巡部門其後搜查12個地點，並檢取相關證物。

不過，台灣現行制度並非毫無管制。經濟部國際貿易署資料顯示，「戰略性高科技貨品」未經許可不得出口，違規者可能面對監禁、拘役、罰款、停止進出口，甚至撤銷廠商登記。問題係部分AI晶片、伺服器或者轉運安排，未必可以直接按一套專門針對中國客戶同算力門檻嘅規則處理，令執法機關可能需要透過偽造文書、虛假報關等罪名間接追查。新制度如果落實，將會收窄呢個灰色地帶。

台灣其實早已逐步向美國嘅科技管制政策靠攏。上年6月，台灣己將華為同中芯國際加入出口管制實體名單，台灣企業向相關公司出口任何產品之前，都需要先獲政府批准。今次據報研議嘅方向更進一步：限制對象可能唔再局限於黑名單企業，而係涵蓋中國所有客戶，只要交易涉及超過特定算力門檻嘅AI晶片或者硬件，就可能受到限制。

美國國會亦繼續施壓。共和黨參議員班克斯（Jim Banks）同民主黨參議員金安迪（Andy Kim）已去信美國商務部工業與安全局（BIS），要求收緊對台積電（TSMC）等晶圓代工企業嘅監管，防止中國企業透過境外子公司或者代理公司，委託生產先進AI晶片。兩人警告，如果呢個漏洞繼續存在，美國其他限制中國取得高階算力嘅措施，效果可能大打折扣。

北京暫時未有就台灣據報研議嘅新制度作出公開回應。不過，中國商務部早前已經批評美國以國家安全為理由「濫用出口管制」，損害中國企業權益，亦衝擊全球半導體產業鏈穩定。台灣如果最終將限制擴大至所有中國客戶，勢必令兩岸科技供應鏈進一步政治化，亦可能引發北京新一輪反制。