中國國家主席習近平離開北京，前往北韓展開為期2日國事訪問。今次係習近平2026年首次外訪，亦係繼2019年後，相隔7年再次踏足平壤。北京將行程定調為鞏固中朝傳統友誼，但喺習近平啟程前夕，北韓已經搶先劃下紅線：核武問題免談。

北韓領袖金正恩嘅胞妹金與正喺官方報章《勞動新聞》發表評論，強調北韓作為核武國家嘅地位絕對不容談判，持續加強核威懾力係不可逆轉嘅最終決定。聲明表面上係回應美國政府，但發表時間極為敏感，等同喺習近平到訪前，率先將朝鮮半島無核化議題封箱。

金與正嘅說法，亦針對美國總統特朗普早前訪華期間，美方所提及嘅半島無核化共同目標。平壤明確表明，無論華盛頓、首爾抑或北京提出任何外交構想，都唔可以再以北韓放棄核武作為起點。對北京而言，今次訪問最棘手嘅地方，係如何保持對平壤嘅影響力，同時避免北韓核擴張進一步刺激美國、南韓同日本加強軍事合作。

北韓喺峰會前連日展示軍事實力。金正恩視察新啟用嘅核物質生產設施，要求核武力量以更快速度擴張；平壤亦公布建造萬噸級驅逐艦同發展水下武器嘅計劃。連串動作顯示，北韓唔係準備重返棄核談判，而係試圖以擁核國家身份，爭取更高外交籌碼。

同2019年習近平訪朝相比，今日嘅金正恩底氣明顯更足。北韓仍然高度依賴中國，但已經唔再只有北京一條生命線。俄羅斯總統普京 同金正恩近年加強軍事合作，北韓向俄羅斯提供軍需物資，並派兵參與俄烏戰爭。南韓研究機構估算，相關合作為平壤帶來嘅經濟與軍事技術回報，價值最高可能達144億美元，不過實際金額涉及大量未公開交易，外界難以獨立核實。

俄朝靠攏令北京面對微妙局面。中國一方面唔希望北韓核武失控，引發東北亞軍備競賽；另一方面亦唔希望莫斯科取代北京，成為平壤最重要嘅戰略靠山。習近平選擇將年度首次外訪交畀北韓，除咗展示中朝關係未有被邊緣化，亦係向俄羅斯同美國表明，北京仍然係處理朝鮮半島問題不可繞過嘅角色。

經濟合作預料會成為今次習金會較容易取得成果嘅範疇。中國官方資料顯示，2025年中朝貿易額達27.35億美元。疫情後中朝交通逐步恢復，平壤亦希望吸引中國旅客、推動房屋建設同擴大邊境貿易。對金正恩而言，俄羅斯提供軍事合作，中國則可以提供更穩定嘅經濟支援。

平壤預料會以高規格禮遇迎接習近平，但盛大場面背後，雙方各有盤算。北京希望證明自己仍然拉得住北韓；金正恩就希望利用俄羅斯呢張新牌，向中國爭取更多利益。今次峰會未必能夠令北韓重返棄核談判，但足以反映東北亞權力格局已經改變：昔日依賴中國嘅北韓，如今開始有本錢同北京講條件。