大埔宏福苑大火造成168人罹難，7幢受災大廈居民，近日獲安排第二次上樓執拾物品。有居民上樓執拾時，發現單位疑被外人入內食嘢吸煙，令住戶質疑災後保安失控；另有居民不滿政府至今未道歉、善款保險金未清楚交代，以及強推收購業權等。

綜合《法庭線》、《香港01》報導，有宏道閣低層住戶上樓後發現，自己屋企枱面竟然滿佈煙盒、汽水罐、魚仔餅、魚肉腸等零食包裝，懷疑有人曾經入屋食嘢同吸煙。涉事居民表示，4月底第一次上樓時，自己根本冇食嘢，離開時只係將水樽、濕紙巾放喺枱面。佢事後愈諗愈覺得荒謬，質疑點解可以有外人入屋進食。

住喺宏道閣低層嘅李小姐，化名，周三同父親再上樓執拾。佢表示，當日入屋準備鋪枱布時，突然發現枱面佈滿垃圾，包括兩包煙盒、芬達汽水罐、魚仔餅同魚肉腸等零食包裝紙。佢即時大聲講「有冇搞錯，點解可以喺度食嘢」，並即場拍照作證。

李小姐表示，同行社工見到之後亦話「真係幾過份，咁多嘢食喺度嘅」。之後李小姐要求社工將垃圾包好，放喺廚房門口。佢強調，4月底第一次上樓時，自己同家人冇喺單位入面食嘢或者吸煙，離開時枱面只留下民政署提供嘅水同濕紙巾。佢又話，當時亦見到警員喺門口「封膠紙打交叉」。

李小姐指，昨日天氣炎熱又翳焗，自己只係想盡快完成執拾，加上屋內雜物太多，又要照顧父親，所以當時冇即時考慮報警，亦冇即場向社工深入反映。但到夜晚處理完一切之後，佢愈諗愈覺得荒謬，直言：「點解可以有外人入去進食？」

佢又講，第一次上樓時情況好匆忙，「水都唔得閒飲啖，邊度得閒可以食嘢，仲有出面有警察同埋民安隊喺度，冇可能有人喺單位裡面食煙。」李小姐表示，自己擔心報案最後都可能不了了之，所以至今未有報警。

李小姐續稱，如果警方因為調查需要入屋檢查，佢可以接受；但佢無法接受有其他人入屋，仲好似自己屋企咁食嘢同吸煙。佢直言：「點解可以有人喺我屋企當自己屋企咁樣開餐，明知道宏福苑係被火燒啦，都仲可以喺人哋屋企嘆返兩包煙。」

佢形容，呢種做法令佢感覺對方好似覺得居民已經「唔爭在」，反正間屋都已經亂晒，「喺度開完餐拍拍籮柚走，都覺得我哋冇問題唔介意」。佢認為，呢種態度對災民非常唔尊重。

事故發生至今，有居民批評，半年以來都冇高級官員出嚟正式道歉同承擔責任。相反，內地5月22日山西一宗煤礦爆炸事故，造成82人遇難、2人失聯、128人受傷，當地官員事後迅速公開鞠躬道歉，最高人民檢察院亦宣布掛牌督辦，追查責任。

宏道閣居民何小姐直言，香港官員只識講「唔理想咋嘛」。佢批評，反觀內地，不論發生礦難定炮竹廠爆炸，翌日通常都會有官員公開道歉，「任何大陸事件都係一有事，第二日啲官員都落台㗎，即刻要耍晒冧嗰啲，但你香港係無呀完全，淨係識同你講收業權囉」。

何小姐又指，宏福苑聽證會已經差唔多進入尾聲，但政府到今日仍然「完全無句道歉」，只係不斷叫居民賣業權。佢又話，居民想召開業主大會，但一直遲遲未能成事。何小姐認為，政府應該將所有善款同保險金發還畀居民，等居民自行尋找承建商重建家園。佢表明拒絕向政府妥協，又話：「由第一日起，我唔會賣業權畀佢。」

宏盛閣居民冼先生亦表示，政府目前畀佢嘅感覺係態度強硬，一心只想收樓。佢批評，政府由頭到尾都係想居民賣咗業權之後「躝屍趌路」，質疑政府口中所謂「情理法」究竟係咩意思。冼先生話：「我唔明白政府仲有咩情理法，情先行，除非個情係解作無情，一心一意就係要收地收樓，然後做咩冇人知！」

佢又認為，政府派出嘅解說員完全冇同理心，形容對方打電話嚟時，好似地產銷售員咁催促佢：「有好多居民賣業權，你幾時上嚟簽約？」冼先生表示，自己聽到之後即場痛斥對方。其後，解說員轉而向佢80歲父親施壓，同樣遭到拒絕。