美國總統特朗普近期接受《TIME》雜誌專訪時，拋出震撼言論，話自己「唔百分百同意」美國應該係一個「法律而非人治」嘅國家。

訪問期間，《時代》記者問到特朗普，係咪認同美國開國元勳亞當斯（John Adams）講過嘅名言：「美國係一個由法律統治，而唔係由人統治嘅政府。」特朗普聽到後咁樣答：「我認為我哋係一個由法律統治嘅國家，但始終要有人去執行法律。喺理想情況之下，應該由好似我咁誠實嘅人去負責。」

特朗普呢番說話，被廣泛解讀為佢對「法律至上」理念抱有保留態度，間接顯示佢認為「人治」喺政府運作入面應該佔有更重要角色。呢種想法明顯同美國歷來以法治為民主基石嘅傳統背道而馳

美國從建國以來，「法律高於個人」一直係美國憲政運作嘅大原則。即使過去歷任總統各有風格，都基本上尊重法律制度。不過，特朗普近年不斷挑戰法院裁決、公開向司法機構施壓，依家又發表咁嘅言論，令人更加擔心佢有意動搖制度底線。

同場訪問中，特朗普被問到會唔會考慮競逐「第三任期」。雖然佢無正面答應，但又似留有伏筆咁講：「有啲漏洞，大家都知道。」佢補充話，自己唔鼓吹利用漏洞，但同時又強調，收到好多人要求佢繼續領導美國。

呢番說話即時引起巨大反彈。因為根據美國憲法，總統只能連任一次，根本無第三任期呢回事。特朗普呢種「有講唔清」嘅態度，被批評係測試民意水溫，為日後可能嘅「破格續任」鋪路。

與此同時，耶魯大學一批1984年畢業嘅校友，聯名發表公開信，直言財政部長貝森特應該重新審視自己喺特朗普政府「推動威權化」過程中嘅角色。

根據《CNBC》報道，呢封公開信已經有超過140位耶魯校友簽署。信中大力批評特朗普政府一連串違憲行為，包括打壓新聞自由、收窄大學自主、侵害移民人權、非法拘禁等等，質疑特朗普正系統性破壞三權分立，削弱民主制度。

信件列舉多個例子，包括政府粗暴對待傳媒，企圖控制資訊流通，又或者喺移民政策上違反人道原則，以致大批無證移民被無理解押。公開信認為，呢啲措施已經赤裸裸地踩過憲法底線，嚴重侵害美國公民基本權利，令人極度擔憂美國民主正一步步被侵蝕。

公開信指出，貝森特必須認真思考，究竟係咪願意成為推動美國朝向「法西斯主義」變質嘅幫兇。面對校友嘅強烈指控，貝森特透過聲明表示，呢啲批評只係「鍵盤後面嘅批評者」發出嘅噪音，自己就選擇以實際行動投入政治工作，覺得能夠喺特朗普政府入面為美國人民服務，係一生嘅榮譽。