根據《自由亞洲電台》16號報導，上海市浦東新區人民檢察院在近日審理一宗集團式詐騙薪金案件，一間外地企業赴上海開設子公司，招募嘅85名銷售人員，全都都係「職業騙薪者」，而且85人聯合詐騙公司，帶到公司嘅所謂「高淨值客戶」，都係十幾蚊請來嘅茄哩啡。

中媒《澎湃新聞》報道指出，檢察機關表示，由2020年1月至案發，騙徒透過「偽造學歷證書、虛構工作履歷、謊報不實能力」等方式成功入職，之後再利用「假造拜訪客戶記錄」等方式，營造努力工作嘅假象，騙取公司底薪或業務報銷款項。

報導指出，由於騙徒未能為公司帶來任何收益，業績一直「掛蛋」。一旦遭公司發現並準備解僱時，就用「正在尋找客戶、客戶資金馬上到位」等方式拖延，藉此騙取更多薪酬。經當局統計，「中招」企業超過260間，涉案金額估計有3500萬人民幣。

檢察官 薛松表示，次次審查證據時，越睇心情越沉重，有一間外地企業到上海開設子公司，招募嘅85名銷售人員全部都係「職業騙薪人」，導致該公司銷售業務陷入癱瘓。不只該公司業績及聲譽受創，更加傷害企業對上海營商環境嘅信心。