根據《美國之音》 25號報導，台灣新一任總統 賴清德即將於5月20號就職，現任總統 蔡英文亦將在當日卸下職務，並將任務交棒俾新一屆政府。台灣民調機構「台灣民意基金會」在近日針對「蔡英文八年任期」，公開向大眾做民調，民調結果顯示，台灣人民對「蔡英文八年執政」評分達到60.5分。

台灣民意基金會23號發佈嘅《蔡英文總統八年執政之民意總結》民調，針對蔡政府之八大施政方針進行調查，在八個領域上之滿意度由高至低次序係「國防、沒收國民黨不當黨產、軍公教年金改革、同性婚姻合法化、外交、經濟、兩岸關係、司法改革」。

今次設計問卷嘅人士係「台灣民意基金會」董事長 游盈隆，游盈隆曾經係民進黨資深人士，但因理念不合在2019年宣佈退出民進黨。游盈隆表示，蔡英文時代即將走入歷史，台灣人民會俾佢點樣嘅評價，係今次民調關切嘅重點。

游盈隆認為，蔡英文八年執政嘅「是非功過」非三言兩語可講盡。長遠來睇，佢將在四方面「歷史留名」，一、去「九二共識」之對中政策。二、年金改革。三、婚姻平權。四、處理國民黨不當黨產。

不過游盈隆指出，蔡英文被人民詬病嘅地方都唔少，包括「司法改革、一例一休勞工政策、前瞻基礎建設、新冠肺炎疫苗採購、轉型正義、新南向政策」等，都引來唔少批評。

游盈隆提到，外在世界變化，改變咗台灣在國際上嘅角色及地位，尤其半導體產業領先全球，蔡政府功不可沒。不過同時都留下三個巨大挑戰俾繼任者，就係「司法改革、經濟成長、兩岸關係」。

最新民意顯示，台灣全民對蔡政府八年滿意度，有44％認為係60分以上，35%認為係60分以下，有18％認為「勉強合格」，分數平均為60.5分。游盈隆認為，台灣人民總評價係「合格」，對蔡英文總統「開綠燈」可以畢業啦！