根據台灣《中央社》8號報導，香港「見山書店」在3月底結業之後，至今仍然有網民在社交平台上留言，在緬懷書店之餘，亦都嘆息香港失去多元嘅自由氣息。「見山書店」位於上環半山，在結業之前，書店被人多次匿名投訴，又被唔同政府部門檢控，在無奈之下而選擇結業。

作為小型嘅獨立書店之一，「見山書店」在2019年「反送中」運動中，於同年6月12號因響應示威者提出嘅「罷工、罷業、罷課」三罷行動，「暫停營業一日」而受到港人關注。響應「三罷行動」之後，書店都難逃遭當局針對嘅命運，最終都被捲入政治風暴之中。在見山書店結業當日，有大概200人到場送別。

位處於英國嘅前香港眾志創黨主席 羅冠聰，在網上引述 區家麟嘅話表示，見山書店係一個好特別嘅地方，但「好的事物」都會消失，香港更加係。根據香港《明報》報導，中文大學「政治及行政學系」講師 蔡子強表示，見山書店具「香港以往有嘅自由、多元氣息」，書店結業前夕屢被投訴，已經反映出香港難以重回以前嘅多元空間。