根據《自由亞洲電台》16號報導，有英國傳媒引述美國聯邦調查局文件，指英國政府早在兩年前已經知情，有中國黑客對英國國會議員進行網絡攻擊，但政府直至個上月先公佈有相關事件。消息引起多名英國國會議員不滿，促請政府交代事件。

英國政府在上個月底公佈資訊指，英國「選舉委員會」及「多名國會議員」，在2021年至 2022年期間遭受網絡攻擊，攻擊者被指係同中國政府有關連之黑客組織「APT31」，之後有包括「歐、美」等多國政府相繼對中國作出同類型指控。

英國媒體iNews在14號星期日引述「美國司法部」（DOJ） 及「聯邦調查局」（FBI）上週所發送嘅一封信函，寄件對象包括多位受上述事件影響嘅歐洲政界人士，司法部在信中指，美方早於2022 年已經發現呢一波網路攻擊，之所以未能及時向「受影響之外國議員」發出警訊，係因為「主權問題」。

美方在信中表示，FBI 官員向英國等「受影響國家政府」作出簡報，講述有邊一類電郵帳戶受到影響，並交代網絡攻擊嘅性質。信中指出，APT31為攻擊者，並提供涉事嘅APT31惡意寄件者帳號俾受影響人士。但文件披露，FBI在發現事件之後，已經將資訊發送俾英國執法機關及情報機構。

英國副首相 道登（Oliver Dowden）在上個月公佈事件，並同時宣佈制裁兩名中國黑客及武漢一間科技公司，並傳召中國駐英大使。不過 道登強調，今次網絡攻擊全數失敗，並冇國會議員嘅帳戶被成功入侵。國會發言人隨後表示，收到相關追蹤電郵嘅人士，只要刪除郵件就可以放心。

不過在15號嘅國會會議上，有多名議員對此表示不滿。其中執政黨 保守黨國會議員 勞頓（Tim Loughton）要求政府，交代延遲通報嘅原因。勞頓認為事件簡直係醜聞，美國FBI在兩年前已經做出通報，事件影響多國政府及議員，但英國政府直至今年3月先公開，佢質疑有其他原因，導致英國政府用咗兩年嘅時間先披露「嚴重安全漏洞」。

另外，在野黨 工黨議員 布萊恩特（Chris Bryant）亦表示，政府嘅回應，難以令佢信服。布萊恩特認為，日前議員同副首相會面，對方甚至冇提到有關狀況，如果議員要認真看待相關問題，就必須對中國政府嘅活動「有及時瞭解」。報導指，包括 自由民主黨及 蘇格蘭民族黨等跨黨派議員，都對網攻事件被隱瞞表示不滿。