根據台灣《中央社》13號報導，在中國公務機關陸續禁用iPhone手機之際，重慶市政務工作平台App「渝快政」在11號通知用戶，因為「技術原因」，不再支持蘋果手機作業系統iOS。在早前，包括「渝快政」在內多個重慶官方App宣布，將開發華為「鴻蒙系統」應用App。

根據社交平台訊息顯示，重慶政務工作平台App「渝快政」在11號通知用戶，已不再支持iOS端，要求市民用戶改用「安卓」（Android）系統。目前「渝快政」頁面已經移除iOS嘅下載連結。

根據重慶日報11號報導，「渝快政」屬於重慶公職人員使用嘅辦公應用平台，目前日活躍用戶達43萬人次，接入各類政務組織8.6萬個，即時動態掌握全市6.53萬名「網格員」活動軌跡，實現組織、溝通、業務全流程上網。

報導指，「渝快政」不再支持iOS，形同迫重慶公職人員更換iPhone，必須加買一支安卓手機，大量體制內員工在小紅書等社交平台吐苦水話：冇錢換手機！有人叫好話：不相容更好，只用電腦版，放工後「不幹工作」。

亦有唔少人表示，越來越多單位禁用iPhone，一早已經換咗華為手機。單位內所有事都在「渝快政」度通知，冇可能唔用，除非想丟掉呢份工。有人話：體制內確實冇辦法，好多嘢唔准用，連特斯拉都唔俾入院泊車，建議搞個雙持手機。

不過有網友認為，「渝快政」並冇說明所謂「技術原因」為何，網友指出，可能係蘋果iOS系統「安全性能」做太好，比安卓手機更難監控或者破解，所以索性就不支持蘋果系統。有公開訊息顯示，包括成都政務平台「蓉政通」都改版，表明不支持iOS。

報導提及，華為在今年1月18號發表HarmonyOS NEXT鴻蒙星河版之後，正在全力普及拓展應用App覆蓋，意圖在今年超越iOS成為中國第二大手機行動作業系統。

在華為鴻蒙星河版發表之後，重慶當局全面響應。在3月7號一場公開儀式上，宣布重慶市近20個本地App，將會啟動為鴻蒙原生應用做開發，其中就包括「渝快政、渝快辦」。