根據台灣《中央社》25號報導，日本東京大學教授 松田康博在近期做出分析，針對中共領導人 習近平嘅「對台統戰劇本」做出預想。松田教授認為，習近平已年過70歲，如果真係要動武，未來10年之內將會係成件事嘅關鍵期。但無論「武力統一」又或是「強制和平統一」，幾乎都冇可能會成功，而佢預測個故事嘅最終結局，就係 習近平「蔣介石化」，只能表面上繼續高呼，實際上只能顧全「幻想」但咩都做唔到。

美媒《美國之音》在24日刊出東京大學「東洋文化研究所」教授、東京大學「兩岸關係研究小組」召集人 松田康博嘅專訪，松田教授針對「習近平嘅年齡及佢嘅台灣劇本」做出分析。松田表示，習近平嘅「年齡」係決定「對台動武」嘅主要因素。並認為習近平最終會選擇在70幾歲，而且仍然活力充沛嘅時候來採取行動。時間點在2027年之後至2032年。

松田教授表示，在中國解放軍嘅「兩棲攻擊能力」及「核武威懾能力」方面，北京覺得自己能力已經足夠，再加上習近平有極大嘅野心，甚至有可能長期掌控國家大位直至老死為止，綜合以上因素並納入習近平「尚有活力」嘅年紀考量，由佢70歲起之後嘅10年之內，台灣將會面臨壓力最大、情勢最危險嘅10年。

松田教授之所以認為未來十年係關鍵期，主要係因為佢認為，要一個人到80幾歲先發動戰爭，在野心方面恐怕已經削弱唔少，甚至唔會積極去達成。如果要習近平到85歲先來發動戰爭，情況更佳荒謬。佢認為，習近平至少會選擇在活力充沛、精神較佳嘅時候來對台動手。

松田教授點出嘅2個時間點，同美國「中央情報局」局長 伯恩斯（William Burns）先前發出嘅預警時間高度吻合。而近年來，美國文官武官都已經多次發出訊號，針對北京武統台灣嘅時間作出示警。

近期美國印太司令 阿基里諾（John Aquilino）在3月20號嘅美國國會眾議院聽證會上亦表示，儘管中國經濟下滑，習近平仍然積極加碼強軍計劃，爭取解放軍在2027年前具備軍事攻台嘅能力。特別係中國軍費在30年之內，增長咗39倍，好大程度超越外界對於「基本防衛」嘅認知。

習近平舊年11月在舊金山曾對美國總統 拜登（Joe Biden）否認，反對有所謂2027或2035年武力攻台計畫。對此，松田康博認為，習近平頻頻搞小動作，同美國總統玩啲「唔高明」嘅「孫子兵法」，習近平「猛烈擴軍」嘅種種作為，同佢親自對拜登講嘅話「完全係兩回事」。

松田教授話，所謂台海戰爭「信則無、不信則有」， 如果認為台海可能會有戰爭，大家就會備戰，備戰所產生嘅效果就係威懾，威懾對方可能要為戰爭付出慘痛代價而收手。相反，如果根本就以為不會有戰爭，中國人只不過係想賺錢搞經濟，而不積極去備戰，反而會降低戰爭代價而引起戰爭。因此，如果台美日等相關國家，合力去提高中國使用武力嘅代價，中國動武嘅機率就會降低。

不過松田教授判斷，雖然習近平野心好大，而佢都決心要在70歲起嘅10年內，將台灣籠罩在「危險陰影之下」，但中國要武統台灣根本係「冇乜可能嘅事」，因為武統要付出嘅代價，以及要面臨嘅風險實在太高。因此，「強制性和統」對中國將會係最好嘅劇本，如果具體形容，就係北京「用武力嚇美國」，逼台灣「放棄抵抗並投降」。

不過，就算係「強制性和統」咁天真嘅夢想，都不可能成真。因為北京根本無法同時滿足「三個條件」，包括：一、中國足夠強大。二、美國產生孤立主義，不想對外打仗。三、台灣的領導人冇抵抗力，克服唔到壓力，一被共軍恐嚇就立即屈服。

松田康博指出，習近平嘅「台灣劇本」，無論係「武統」又或是「強制性和統」，最終成功機會都唔大，最後嘅結局就係「習近平『蔣介石化』」。松田教授話，蔣介石當年仲體力充足、意氣風發嘅時候，都曾經意圖聯合蘇聯，想要用武力「反攻大陸、統一中國」。但時間一拖長，客觀條件不允許，最終被迫要放棄幻想。只不過蔣介石在之後，依然表面上繼續高呼「反攻大陸、統一中國」，就是要延續一代國民黨人嘅期盼。

報導指出，「以武力為後盾」嘅統一台灣劇本，同法國巴黎「亞洲研究中心」資深研究員 高敬文嘅「灰色地區戰略」高度相似。高敬文在受訪時表示，北京長期高呼「對台武統」，只不過係共產黨在軍事或政治嘅宣傳戰「環節之一」，實際上並無發生武力攻台嘅可能性。

美國前國務卿 蓬佩奧（Mike Pompeo）嘅「中國政策」首席顧問 余茂春同樣認為，而家習近平對台灣已經「無計可施」，要習近平冒險去進攻台灣，可能性已經唔高 。