23條立法快速通過，一眾黨媒過程中當然大力護航。官媒《中新社》報道訪問一批外國人，稱23條立法讓佢哋喺港生活更具安全感，香港具有優越的營商環境，對國際企業的吸引力有增無減。另外，經濟學人全球營商環境排名，香港今年再跌兩位到第9名。

香港《基本法》第23條規定，香港特區應自行立法禁止任何叛國、分裂國家、煽動叛亂、顛覆中央人民政府及竊取國家機密的行為，禁止外國嘅政治性組織或團體喺香港進行政治活動，又禁止香港的政治組織同外國嘅政治組織建立聯繫。

《中新社》報道引述香港印度尼西亞商會會董何震東表示，在港生活嘅外國商人大都係奉公守法嘅生意人，好少有人會去觸犯23條立法中嘅相關條例。佢建議，特區政府可以設立一啲相關嘅咨詢中心，幫助外商更好地適應香港社會，便利佢哋喺港營商。

報道又引述香港奧地利商會主席鮑拿表示，法律與秩序對營商嚟講係非常重要嘅因素。佢講，23條立法針對嘅係危害國家安全嘅行為同活動，商會將仔細研讀相關條文，並同喺港嘅奧地利商人進行普及。

另外，英國保誠集團(保誠)首席執行官華康堯(Anil Wadhwani)表示，香港依然擁有強大嘅增長潛力，認為對人才仍然好有吸引力，對香港嘅前景好樂觀。

不過，值得留意嘅係，在23條立法完成嘅同時，英國智庫《經濟學人》發布嘅全球營商環境排名顯示，香港排名下跌2位至第9，而首位嘅新加坡，就連續16年排第一。

報告指，新加坡、丹麥同埋美國將成為未來五年營商環境最好嘅三個地區，而香港則喺十大名單內排名靠後。

報告稱，印度係唯一一個潛在規模可與中國匹敵嘅單一市場，其經濟基本面穩固，數字基礎設施同埋人口結構均屬利好，而且政府推出政策吸引製造業投資。