過去「浸鹹水」去海外留學，被視為可以輕易搵到高薪厚職，令唔少中國學生都想出國讀書。不過時移勢易，因留學成本高漲，中國同西方嘅關係轉變等，令海歸光環不單褪色，工作唔容易而且一樣可以人工低，網上仲流行仲有「海歸變海廢」呢句說話。

根據美國國際教育協會嘅數據，2022至2023，赴美留學嘅中國學生總數跌到至28萬人，比起2019至2020學年新冠疫情期間，當時嘅歷史新高37萬人，減少咗24%。

內媒《解放日報》指出，留學成本高漲係造成中國留學生人數下跌嘅主要原因。以美國為例，公立大學嘅學費喺過去20年間升咗170%至211%，私立大學亦升咗144%。再加上生活費，而家1年嘅平均美國留學成本約人民幣56.8萬元，如果係一線大城市就更高。

內媒《山東商報》報導指，有網民分享佢去咗英國留學3年，使咗接近200萬元人民幣，但回國後只搵到一份月薪4000元嘅工作。嗰名網民表示，原本以為海歸揾工作不成問題，但實際情況係，面試嘅公司更傾向請國內重點培養嘅頂尖名校嘅畢業生。

同時亦代表，留學「回本」嘅時間變得更長。以3年制嘅學位課程為例，過去留學生回本嘅時間約為5.57年，而家則拉長咗至8.33年。

《解放日報》報道指出，海歸經歷喺國內職場已經冇特別嘅優勢。對留學生傾向性最高嘅職業，如留學輔導、語言培訓、翻譯等職位，呢幾年因為行業發展或大環境影響，機會亦都減少。

另外，由於美中關係持續惡化，亦都影響到中國學生赴美留學嘅意願。據《美國之音》報導，匹茲堡厚仁教育集團首席執行官陳航（Andrew Chen）表示，中國政府嘅多項措施，包括刻意降低英語教育嘅重要性、宣傳美國槍支暴力、將美國形容為一個衰退大國等，結果就係令中國家庭唔想將仔女送去美國讀書。

對於海歸光環不再，有內地網民表示：「現在的海龜太水了，尤其是海外一兩年的碩士生，大多數海外學歷不如國內的一本大學」「考不上985、211的才花錢去外國買個水碩證，海龜的名聲都讓這群人敗壞成海帶了」「去年我們公司來一個英國畢業回來的碩士，試用期考核都通不過！說實話還是能力不行！以為鍍金可以拿高薪時代過去了」「如果要不留學，也許4000塊的工作也找不到。」