政府正研究急症室實施「真急症減費、非急症加費」收費政策。醫務衞生局局長盧寵茂早前指唔會「一刀切」加價，而係「可加可減」。不過瑪麗醫院前行政總監就陸志聰就指，急症室猶如打仗，以病人緊急情況嚟收費會產生紛爭，形容要醫護花精力處理係絕不理想。

盧寵茂所嘅指「可加可減」，即最緊急的危殆及危急病人收費可低於現時嘅180元，次緊急及非緊急病人收費則提升至貼近家庭醫生水平。佢指急症室的成本較一般門診高，話有人「生暗瘡」、「腳痕」就去急症室求診，所以要透過加價畀市民明白，急症室唔係處理輕症同唔可以濫用。

瑪麗醫院前行政總監陸志聰今日（11日）喺電台節目表示，急症室輪候時間長，係一個「老大難」嘅問題，單靠加價無辦法解決，係要有多方面嘅配套。佢指出，如果急症室按病人危急情況嚟收費，會影響前綫運作，而且容易引起爭議，要醫護花精力處理同臨床治療無關嘅事，係絕對不理想。

陸志聰又指，以往公立醫院試過集中資源處理較危急病人，但發現被列爲「次緊急」同「非緊急」嘅病人，有約10%經臨床診斷後需要入院，如果要實行病人分類收費，必須有措施防止病人在等候診治時情況轉差，他舉例指盲腸炎或小童發燒等，早期病情未必會完全反映在生命表徵上，難以察覺嚴重性。

陸志聰表示，現時大多私營醫療機構都不設夜診，如果政府將次緊急同非緊急病人嘅收費，提升至貼近家庭醫生水平，相信業界會有興趣提供夜診服務。佢又指出，喺新冠疫情期間，公私營醫療機構都試過以視像方式遙距診症，認爲值得研究作爲長遠措施，為病人提供多一個選擇。

現時急症室分流制度為5級，第一類危殆及第二類危急均會被即時救治，而第三類緊急個案也會快速醫治；至於第四類次緊急及第五類非緊急，則一般要等候數小時至十數小時先見到醫生。無論邊個級別，都一律收費180元。

對於急症室疑按分流類別加價，前綫醫護反應都唔同意，日前急症室醫生李福基就認為執行上唔可行，會變相令前線成為磨心，佢指，現時分流站護士已經常畀病人批評，如按分流類別加價，矛盾會更大，仲話「如果係咁樣加，我唔做㗎喇，你叫盧局長自己過嚟做啦！」