1架澳洲海軍海鷹（Seahawk）直升機，日前喺黃海國際水域執行聯合國安全理事會對北韓制裁決議時，被1架中國殲-10戰機投下多枚照明彈，險些被直接擊中。事實上，中方經常使用類似招數，例如喺2022年6月，一架中國J-16戰機就對澳洲P-8偵察機故意噴焰。

澳洲國防部發表聲明，指呢單事件發生於4日，當時澳洲防空作戰驅逐艦「荷巴特號」（HMAS Hobart）喺黃海國際水域巡航，正執行聯合國安全理事會對北韓嘅制裁任務。

澳洲國防部長馬利士（Richard Marles）透露，1架中國殲-10戰機喺1架澳洲海軍海鷹（Seahawk）直升機嘅飛行路徑上投下多枚照明彈。呢架海鷹直升機原本部署喺荷巴特號上，中國戰機大約係喺佢前方300公尺、上方60公尺處投彈。

馬利士表示，中方嘅行為非常危險，「完全無法接受，咁做唔單止危險，若果照明彈真係擊中直升機，後果將不堪設想。」佢強調，即使遇到這種挑釁，澳洲都唔會停止合法嘅海上行動，包括履行對北韓嘅制裁。

澳洲國防部表示，事件雖然無造成任何人員傷亡或財產損失，但澳洲政府已經向中國提出正式抗議，北京方面則對此事件未有立即回應。

澳洲總理阿爾巴尼斯（Anthony Albanese）譴責中方此舉，稱已經向中國明確表示，咁樣做係唔專業、唔可以接受嘅。阿爾巴尼斯表示，澳洲國防軍對國際社會好重要，事件發生時國防軍正在黃海國際水域執行聯合國安全理事會對北韓嘅制裁決議，佢哋進行呢啲任務時唔應該有任何風險。

澳洲反對黨領袖達頓（Peter Dutton）亦痛斥中方此行為為「挑釁、危險且完全不必要」，並警告話：「澳州國防人員將會喺某一刻因為中方嘅一名戰機飛行員或一名海關人員嘅錯誤判斷而失去生命…佢哋置澳州人於危險之中，咁係完全唔可以接受嘅。」

當然，類似行為中方都唔係第一次做。例如喺2022年6月，澳洲國防部亦曾譴責，一架空軍P-8偵察機喺南海執行例行偵查任務時，一架中國J-16戰機加速衝到澳洲偵察機前方，並對著偵察機故意噴焰，導致偵察機引擎吸入噴焰中鋁片等金屬碎屑。去年11月，澳洲軍艦圖文巴號(HMAS Toowoomba)潛水員被一艘中國軍艦發出嘅聲納脈衝導致受傷。

而中方對菲律賓、日本、加拿大、美國、台灣、南韓等軍隊所做嘅類似行為就更加多。《I》