今（20日）係蘋果iPhone 16同華為非凡大師Mate XT正式發售嘅日子，喺呢個中美科技對決嘅日子，唔少中國人「用腳投票」去支持蘋果。而早前盛讚華為手機嘅香港藝人李國麟，就被發現影片係以iPhone拍攝上載，遭網民質疑係「假愛國」。

台灣《中央社》報道，喺北京王府井，蘋果同華為嘅旗艦店只隔住一條街，形成咗美中科技競爭嘅縮影，蘋果店門口人潮洶湧，好多「果粉」順利拎到新機。相比之下，華為門市嘅取機時間較長，門外排隊嘅人冇蘋果店咁多。

今朝8點，蘋果店正式開賣現貨手機同提供網上取機服務。《中央社》記者實地觀察，店內店外都排滿咗等緊取機嘅顧客，場面熱鬧非常。華為門市則喺10點先開始取機，但開店前等緊取機嘅人明顯比蘋果店少。而且因為三摺手機嘅使用規則較為複雜，消費者取機時間更長。華為門市外仲有唔少純粹「睇熱鬧」嘅人。

2000年後出生嘅趙先生，今日係首批取到華為手機嘅消費者之一。佢同《中央社》記者介紹，自己喺7號喺門市預約，買咗最貴嘅1TB版本，售價人民幣23,999蚊嘅非凡大師Mate XT。今日朝早9點40分收到短訊，就即刻去到門市取機。

趙生花咗接近40分鐘先攞到手機。被問到點解會買咁貴嘅「非凡大師」，佢答：「支持國貨嘛！」原來佢本來都係用蘋果手機，用咗多年覺得冇乜創新，而非凡大師令佢覺得更加新穎。不過，趙生拎完華為手機之後，仲要即刻去對面嘅蘋果店取最新款嘅iPhone 16。

喺蘋果店取貨嘅一位「果粉」向《中央社》記者表示，佢期待iPhone 16好耐，因為自己想換手機。佢話，今日排隊時間冇預期咁長。問到有冇考慮華為新嘅三摺手機？佢認為價格太貴，以佢學生嘅身份難以負擔。

蘋果iPhone手機喺中國高端手機市場嘅競爭力近期有所疲弱。今年5月，研究機構TechInsights嘅數據顯示，蘋果喺今年第一季嘅市佔率只得13.7%，跌出前五名。不過被視為蘋果手機勁敵嘅華為Mate XT，都面對住中國經濟消費降級嘅困境，同埋新機技術產能嘅限制，令到Mate XT嘅銷售數字仍然難以估計。

一位北京嘅通訊手機業者坦言，Mate XT嘅產能可能不足，依家預訂都未必等到、買唔到。佢預計呢款手機未來售價會下降，直言而家嘅價格太貴。

另一邊廂，香港藝人李國麟喺9月10日於佢嘅微博上，上傳咗一段大讚華為嘅影片。根據影片內容，李國麟對華為Mate XT讚不絕口，直豎拇指，話：「華為的Mate XT真是一款傑作，展現了中華的實力與國家的榮耀，遙遙領先於同行」不過，之後有網民發現，呢啲盛讚華為手機嘅影片，竟然係用iPhone拍攝同上載，令李國麟被質疑「假愛國」，有網民揶揄佢：「蘋果代表生活，華為只係工作。」

面對質疑，李國麟後來澄清話：「我確實好渴望購買呢部Mate XT，但有邊個可以話畀我知而家有咩途徑可以買到？難道只能透過黃牛，畀多5到10倍嘅溢價？喺展覽區，我連摸下新機嘅機會都冇。」網民聽到佢嘅解釋後，都感到驚訝，直言連「鳩摩智大師都買唔到」，仲叫佢快啲買返嚟「出火焰刀」。《I》