中美關係因關稅戰越鬥越烈，據報中國已經下令北京官員進入「戰時態勢」，所有官員一律唔准放假，手機要24小時保持開機，隨時準備應對美國任何動作。面對美國近期不斷升級嘅關稅措施，中方多次高調表態，表示絕對奉陪到底。國家主席習近平日前更加親自開腔，強調中國唔會畏懼任何不公平嘅打壓。

根據路透社引述多個知情人士嘅消息透露，中國為咗應對美國，已經下令北京官員即時進入「戰時態勢」。外交部同商務部嘅官員更加被要求即時取消休假，並且保持手機全天候開機，隨傳隨到。同時，北京當局亦發動外交攻勢，主動接觸其他國家，希望拉攏更多盟友，共同反制美國嘅關稅政策。消息指出，北京嘅外交官已經向多國發出正式信函，尋求緊密合作，其中更包括美國喺亞洲嘅重要盟友日本同埋南韓。

自從美國總統特朗普啟動呢場關稅戰之後，曾經多次公開表示有意同習近平直接通話。不過，美國貿易代表格里爾日前接受哥倫比亞廣播公司訪問時，就明確指出特朗普同習近平到目前為止並冇安排任何通話計劃。佢仲話，自4月2日特朗普宣布實施對等關稅措施以來，呢個議題已經升級到國家領導人層面，佢更將現時嘅僵局完全歸咎於中國嘅報復行為，但再次重申特朗普希望喺未來適當嘅時候，可以同中方重新展開對話。

此外，美國廣播公司早前曾經引述消息人士爆料，話中國喺上星期宣布最新嘅報復措施前幾個鐘，特朗普團隊曾經私下同中國官員進行討論，警告中方唔好再採取報復行動，仲再次呼籲習近平盡快同特朗普直接通話，但係中方完全冇理會美國嘅要求，最終選擇繼續報復。《I》