烏克蘭總統澤連斯基（Volodymyr Zelenskyy）表明，基輔政府準備籌集高達500億美元，向美國購買先進防空系統同其他軍事支援設備。佢強調，烏克蘭唔係伸手黨，唔係再靠華府送大禮，而係希望成為美國軍工產業正常嘅客戶，同美方建立更長遠穩定嘅軍事合作關係。

澤連斯基喺基輔會見本地記者時表示，佢哋唔介意用乜方式付款：「你想我哋擺筆錢入個基金，定係直接匯畀你哋都得。我哋願意比錢，唔係免費攞貨。」

佢進一步指出，烏方已經正式向美方提出購買多款指定武器系統，包括十套愛國者防空飛彈系統。澤連斯基話，呢筆軍購唔止係一單交易，而係一種「未來安全保證」，「打完仗之後，防空系統依然係我哋防守烏克蘭領空嘅關鍵，亦代表住美烏之間嘅戰略信任。」澤連斯基又補充，佢哋「甚至準備搵到300億甚至500億美元」，用嚟構建一套可持續、具規模嘅國防系統，成為「軍事自主」國家。

特朗普早喺今年2月就公開講過：「我哋想同烏克蘭做一筆交易，攞番啲稀土、石油，或者任何值錢嘅資源，換返我哋出嘅錢。」佢形容，過去送出去嘅支援，烏克蘭應該有所回應。

雖然澤連斯基願意出錢買新武器，但佢早前明言，唔會為過去美國已經送出嘅軍援「補數」。喺3月時，佢曾講：「如果要傾關於礦產嘅合作協議，我哋可以傾，但唔會攬舊債。要講新支援，可以商量附加條件。」佢又補充：「我哋知道，呢屆政府唔會免費做嘢。」

分析認為，澤連斯基今次開出天價，除咗釋出「唔再做伸手黨」訊號，亦係針對美國國內對烏援助聲音日漸分歧，希望透過變成付費客戶，穩住美方軍援持續性。此外，今次若能成功以大手交易方式買入美國先進軍備，烏克蘭亦會正式躋身美國軍工業系統嘅「VIP客戶」，與以色列、沙地阿拉伯等軍事同盟國齊肩。這種轉變有機會令基輔喺戰後重新規劃國防戰略時，擁有更大自主權。

雖然交易未塵埃落定，但美國軍火商已經聞風而動。有軍事專家指出，烏克蘭若真願意豪擲500億美元，勢將成為美國國防產業一大新收入來源。美國政府只要一點頭，雷神（Raytheon）、洛歇馬丁（Lockheed Martin）等大型承包商可望即時接單。

而今次澤連斯基主動「開價」態度，亦令一眾美國政客改口稱讚其「有誠意、識做」。不過，有評論指，呢種軍事財務化趨勢可能令戰爭變得更加商品化，「買到防空系統，唔代表買到和平。」