一向低調嘅美國最高法院首席大法官羅伯茲（John Roberts）罕見發表公開聲明，強烈譴責特朗普要求彈劾聯邦法官嘅行動，令特朗普嘅司法部門矛盾正式浮上檯面，演變成一場公開對抗。

現年70歲嘅羅伯茲，擔任美國最高法院首席大法官已經接近20年，歷經五屆政府，見證過小布殊、奧巴馬、特朗普、拜登，再到現時嘅特朗普2.0。佢嘅地位舉足輕重，唔單止係美國司法界嘅領軍人物，更是三權分立制度下，司法獨立嘅象徵。

特羅伯茲在簡短但極具份量嘅聲明中表示：「超過兩個世紀以來，彈劾從來唔係針對司法裁決分歧嘅適當回應。」佢進一步強調：「正常嘅上訴審查程序，正正就是為了解決這類爭議而設。」

特朗普早前喺社交平台「真實社群」（Truth Social）發文，直斥聯邦地區法院法官波斯柏格（James Boasberg）應該被彈劾。佢喺貼文中怒轟：「呢位法官，好似我之前面對過嘅其他不正派法官一樣，應該被彈劾！」

事件起因於波斯柏格日前下令暫停遣返航班，阻止當局驅逐涉嫌非法入境嘅移民。不過，即使有呢項命令，當局仍然按原定計劃繼續遣返行動，並安排航班將據稱來自委內瑞拉黑幫「阿拉瓜火車」（Tren de Aragua）成員嘅非法移民驅逐至薩爾瓦多。

白宮一直以來對聯邦法院阻撓特朗普嘅政策感到不滿，不過今次係特朗普自今年1月重新上任以來，首次親自要求彈劾法官，事件格外引起關注。

根據美國憲法，聯邦法官乃終身職，只有當其涉及「重大罪行或不檢行為」時，才能夠被眾議院彈劾，並經參議院定罪後才可被免職。由於程序極為嚴格，美國歷史上極少出現成功彈劾法官嘅案例，最近一次已經要追溯到2010年。

特朗普嘅發文迅即引來黨內盟友嘅回應。德州共和黨籍眾議員吉爾（Brandon Gill）數小時後宣布，已經向眾議院提交對波斯柏格嘅彈劾提案，並指波斯柏格是「激進行動派法官」，明顯帶有政治目嘅。

對於羅伯茲嘅強烈回應，美國里契蒙大學（University of Richmond）法學教授托比亞斯（Carl Tobias）認為十分罕見。佢指出，今次並非羅伯茲首次同特朗普針鋒相對，早喺特朗普第一個任期內，當時特朗普曾公開批評聯邦法官嘅裁決，羅伯茲便曾作出類似回應。

當時，羅伯茲明確表態：「我哋無所謂嘅奧巴馬法官、特朗普法官、布殊法官或者柯林頓法官。」佢強調：「我哋擁有嘅係一群專業法官，竭盡所能確保每一位企喺法庭面前嘅人，都能夠獲得公平對待。我哋應該珍惜呢種司法獨立制度。」