自特朗普展開第二任期以來，標普500指數累計重挫6.4%，締造2009年以來美國總統上任前50天最差表現，美元指數重貶5.1%，走勢與價格相反嘅美國10年期公債殖利率則下跌。消息指，特朗普同各大企業代表會面時辯稱，呢一波下跌係因為前幾週「市場過熱」所致。

特朗普周二（11日）與美國多家大型企業嘅行政總裁會面，唔單止為佢推行嘅關稅政策辯護，仲話有可能再進一步調高關稅。與會嘅企業領袖當場目睹自己公司因經濟衰退同通脹疑慮而導致股價急挫，市值大幅縮水，場面一度尷尬。

呢場由商業圓桌會議（Business Roundtable）主辦嘅聚會，有大約100位美國企業高層出席，包括蘋果（Apple）、摩根大通（JPMorgan Chase）同沃爾瑪（Walmart）等美國重量級企業嘅負責人。

美股周二繼續受壓，標普500指數全年跌幅擴大至5.3%。由於特朗普喺周日播出嘅訪談中無明確排除經濟衰退可能性，令市場恐慌加劇，標普500指數周一急挫，創下今年最大單日跌幅。但特朗普周二改口，向記者澄清：「我完全唔認為會有經濟衰退。」

喺正式開講之前，特朗普先向在場媒體捍衛自己嘅關稅立場，佢向投資者保證，現時入市最終一定會有回報。佢話：「呢啲關稅將會為國家帶嚟巨大收入，仲有可能再進一步提升。」

當特朗普發表演說時，與會企業高層大多面無表情，場面氣氛凝重。會議只開放媒體短暫拍攝，當特朗普提到「現場有啲人我唔鍾意」時，場內傳出零星笑聲。據知情人士透露，喺隨後嘅閉門會談中，特朗普向企業領袖承諾，將加快環評審批流程，並對喺美國生產嘅企業減稅，將稅率降至15%。

消息人士又話，特朗普辯稱市場數星期前「可能過熱」，並透露中國國家主席習近平對美國最新嘅關稅政策「並唔高興」。

與此同時特朗普早前威脅會對加拿大進口到美國嘅所有鋼鋁產品額外加徵25%關稅，總關稅達50%，以報復加拿大安大略省向輸往美國三個州嘅電力徵收25%附加費。安大略省長與美國商務部長盧特尼克（Lutnick）磋商後，同意暫停徵收電力附加費。白宮隨即表示，特朗普為美國人民爭取到勝利。

加拿大安大略省周一開始對輸往美國紐約州、密歇根州同明尼蘇達州嘅電力徵收25%附加費，以報復美方對部分加拿大商品同能源徵收進口關稅。特朗普隨後喺佢自己嘅社交媒體「真實社群」發文，話因應加拿大嘅舉動，已指示美國商務部對加拿大鋼鋁關稅加徵至50%，該措施原定喺周三上午生效。

安大略省省長福特（Doug Ford）表示，喺美國商務部長盧特尼克同意進行貿易會談後，加方決定暫停電力附加費徵收。福特宣布呢個決定之後，白宮立即宣稱特朗普為美國人民爭取到勝利，「特朗普總統再次利用咗美國作為世界最大經濟體嘅槓桿」。《I》