紐西蘭總理盧克松（Christopher Luxon）周一表示，庫克群島總理布朗（Mark Brown）最近聲稱要同中國洽談包括基建、貿易同經濟等領域合作後，紐西蘭方面希望同庫克群島進行透明溝通。對此，布朗回應稱已通知紐西蘭該協議與安全問題無關，紐西蘭「無需檢閱任何文件細節」。

庫克群島位處紐西蘭同夏威夷之間，由15個島嶼同環礁組成，雖然領土面積唔大，但包括海域嘅話，庫克群島總面積則高達190萬平方公里。庫克群島係與紐西蘭有自由聯合協議嘅自治國家，當地政府擁有完整嘅自治權利，由紐西蘭提供預算支持，並監督外交與國防事務。庫克群島總人口17,000，擁有紐西蘭公民身分。

紐西蘭總理盧克松話：「按住憲法安排，我哋希望同夥伴之間可以就國防同安全問題坦誠對話；當紐西蘭了解協議內容後，政府會決定下一步點回應。」

上週，紐西蘭曾經警告，如果庫克群島同中國嘅新協議牽涉到國籍安全問題，會要求庫克群島護照持有人放棄紐西蘭護照。之後布朗宣布擱置推出獨立庫克群島護照嘅構想。

紐西蘭副總理彼得（Winston Peter）辦公室周日亦發聲明，指紐西蘭多次要求庫克群島就布朗同中國簽協議進行分享或磋商，但一直未獲合適答覆，引起紐西蘭「嚴重關切」。

庫克群島總理布朗喺上週五透過當地電視新聞facebook專頁發放視像，直言：「對於有啲人話我哋同中國往嚟有乜秘密，我完全唔認同。我哋一向以誠信同透明方式處理國際事務，做任何交易都會以庫克群島最大利益出發」，但佢冇透露協議具體細節。

佢會由本週末起對中國展開國事訪問，主要討論可再生能源同農業議題，但亦會觸及海事問題、航運同海底礦產開發——呢啲都係紐西蘭、澳洲、美國及其他國家特別留意領域。

《衛報》指，布朗稱正跟中國協商於基建同深海採礦研究方面合作，詳細條款將喺簽署後公佈。路透社報道，庫克群島本身內部亦有人質疑協議過度保密。反對黨民主黨領袖蒂娜·布朗（Tina Browne）就向紐西蘭電台531pn表示，庫克群島人對缺乏諮商充滿疑慮，特別係庫克群島護照問題。蒂娜·布朗質疑：「如果根本冇乜好隱瞞，點解唔先問下紐西蘭意見？」

中國暫時無證實庫克群島今次訪華行程，但中國外交部周一仍形容庫克群島「係南太平洋重要合作夥伴」。中國外交部發言人郭嘉昆強調，「中方認為紐西蘭同庫克群島都係中國重要合作夥伴，亦補充指中國同呢個太平洋國家發展關係，唔係針對任何第三方。」

今次事件都係近幾個星期內紐西蘭同南太平洋國家之間第二次磨擦。上個月，紐西蘭副總理彼得斯指因同基里巴斯總統交流不足，會重新審視對基里巴斯發展援助。

事實上，外界對北京積極喺太平洋建立經濟、軍事同戰略影響力一直憂心。《衛報》引述梅西大學國防與安全研究中心副教授波爾斯（Anna Powles）表示，中國喺太平洋地區角色已大幅增強。

波爾斯相信喺現時地緣政治形勢下，紐西蘭好需要審慎處理同庫克群島關係，亦唔想破壞同其他南太平洋夥伴嘅互動；佢認為庫克群島可以成為「晴雨表」，檢視紐西蘭同太平洋溝通模式是否得宜。

由於協議具相當保密性，外界擔心中國以此為跳板深耕太平洋，特別係自所羅門群島棄台灣投向中國，並簽訂神秘安全協議後，各方就更憂慮中國會否藉此扎根南太平洋，甚至派海軍同地面部隊進駐該區，衝擊其他國家在當地嘅航行自由。《I》