日本執政嘅自民黨今日舉行總裁選舉，石破茂喺第二輪投票中勝出，將成為日本新任首相。相對於另一位主要競爭者高市早苗，石破茂被認為立場相對親中，主張同中國、南北韓建立信任關係。佢當選嘅消息傳出後，日圓兌美元匯率應聲狂升，「日本終了」登上X熱搜榜首，更有日本網民直言今次係習近平嘅勝利。

政壇老將：多次入閣，四度挑戰自民黨總裁

石破茂喺1957年2月4日出生於東京，父親石破二朗係鳥取縣知事，後來做過內務建設大臣同參議員，母親就係一名教師。石破茂自細喺鳥取長大，呢個地方位於日本本州西部，面積細，人口亦係全國最低嘅地方。雖然咁，但石破茂並冇受到地理局限，反而喺政壇中闖出一片天。

石破茂大學畢業於慶應大學法律系，1979年入職三井銀行，原本有個安穩嘅職業生涯。不過，1981年老豆過身，加上得到老豆嘅好友——前首相田中角榮嘅支持，決定「子承父業」，參選眾議院議員，結果1986年首次當選，之後更加連任12屆，喺國會議場上有住穩固嘅地位。

石破茂喺政壇打滾多年，經歷過多次大起大落。1993年，佢支持對宮澤內閣嘅不信任案，一度退出自民黨，但1997年又再度回巢。2002年首次入閣，擔任防衛廳長官，2007年福田康夫時期升任防衛大臣，之後麻生內閣又任命佢做農林水產大臣。到2012年安倍晉三第二次上台，石破就做咗自民黨幹事長同地方創生大臣，無論政壇風雲如何變幻，佢一直穩坐高位。

石破茂喺2015年成立「水月會」（即石破派），立志要做日本首相。佢曾喺2008、2012、2018同2020年四次挑戰自民黨總裁，點知次次都鍛羽而歸，其中兩次仲輸畀安倍晉三。

過去一直被視為親中派

石破茂一直主張提升地方經濟發展，佢喺2017年出版嘅《日本列島創生論》一書中，就強調要活化地方經濟，推動新資本主義，同時關注農業、女性同服務業等領域。佢仲寫過《政策至上主義》同《不懂軍事，莫談和平》等書，顯示佢對政策同軍事都有深入見解。

喺國際關係方面，石破茂認為應該對亞洲同歷史問題持有誠實態度，佢主張同中國、南北韓建立信任關係。不過，佢亦強調應該成立「亞洲北約」，聯合亞洲國家應對中國同北韓嘅安全威脅。針對靖國神社問題，石破認為應該將甲級戰犯分祀，佢喺2002年做防衛大臣之後就再冇去過參拜。

石破茂同台灣關係親近，佢曾多次訪台，2022年7月更同台灣前總統蔡英文會晤，討論中國威脅，認為台日應該喺緊急情況下建立共識，確保法律同部隊運作嘅協調性。今年8月，石破茂再次訪台，同台灣副總統賴清德會面，強調要避免東北亞變成「下一個烏克蘭」。

有台灣涉外人士指，石破茂喺2010年前一直被視為親中派，佢認為中國唔係威脅，但自從習近平上台後，佢嘅立場就變得強硬。佢喺9月22日嘅電視節目中，更提出應修改法律，若中國軍機侵犯日本領空，應該進行「危害射擊」。《I》