貴州省黔南州前州長鍾陽因為涉嫌貪污受賄超過6000萬人民幣，最近被中共開除黨籍，同時被法院判監13年。不過，更加轟動嘅係佢喺任內竟然同多達58名男下屬發生婚外情，甚至網傳影片顯示「每次需要10名男子輪流上陣」，呢啲荒唐行徑引起咗輿論嘅強烈反響。

中央紀委國家監委網站日前指稱，鍾陽「喪失理想信念，背棄初心使命，處心積慮對抗組織審查；無視中央八項規定精神，違規收受禮品、消費卡（券）；違反生活紀律；喪失紀法底線，將黨和人民賦予的權力當作攫取私利的工具，大搞權錢交易，利用職務便利為有關單位和他人在土地出讓、項目承攬、資金撥付等方面謀取利益，並非法收受巨額財物」。

根據《新華網貴州頻道》報道，貴州省委經過討論，最終決定開除鍾陽黨籍，取消佢黨代會代表資格，並依法追繳所有非法所得。法院亦認定，鍾陽喺職期間大肆收賄，利用職權謀取私利，並判佢13年監禁。

報道指，鍾陽出身於貧困家庭，父母辛苦工作先供佢讀書，但佢冇辜負家人期望，喺當時考上咗大學，畢業後順利加入共產黨共青團，正式踏上政治生涯。出身平凡嘅鍾陽年紀輕輕，26歲就升到部長級別，呢個火箭式升職速度引起咗唔少人嘅不滿，但同時亦有人話，當時有「老部長」特別鍾愛佢，背後靠嘅係「爬床」上位。

今年2月判決出爐前，內地媒體已經瘋傳鍾陽嘅荒淫行徑。知情人士爆料話，鍾陽嘅人生哲學就係「睡過嘅床越多，官位就會越高」。仲有人指，鍾陽喺屋企、辦公室甚至公務車上都儲備咗大批保險套，身邊男性一旦畀佢睇中，根本冇得走。

當地網友仲指控，鐘陽平日毫不掩飾自己養男寵，出雙入對摟摟抱抱，仲大大方方出入摩鐵，完全無視自己嘅官員身份。據《網易大風》報道，鐘陽包養58個「男寵」嘅行徑喺全國大有名氣，佢鍾意喺酒店包房度搞「派對」，一年365日，除咗工作之外，265日都喺去酒店嘅路上。

部分男下屬為求升遷，甘願成為佢嘅情人；另有部分人則因為驚佢嘅權勢被迫就範。事件曝光後，鍾陽雖然聲稱自己對行為感到羞愧，話貪求唔屬於自己嘅嘢，最終嘅下場只能係「粉身碎骨」，但佢嘅悔意並冇平息公眾嘅憤怒。

鍾陽呢個「女官虎」貪色貪權貪錢，將中國官場嘅腐敗醜聞推上另一個高峰。佢唔單止利用職權收賄，仲將色欲變成上位工具，徹底踐踏官場道德底線。有網民狠批：「這些貪官真是連道德底線都沒有，完全沒人性！」亦有人揶揄：「這是位『女版和珅』，貪錢、貪色一樣都不少！」亦有評論指出，鐘陽事件只係冰山一角，反映出中國官場內部嘅亂象。《I》