中國股市長期低迷，內地股民叫苦連天。內媒《新浪財經》昨（15日）聲稱，A股雖然一度重挫，但外資撈底動作非常明顯。唔少網民對番說法不以為然，指根本係將假外資當成外資，而「指鹿為馬」就係亡國嘅前兆。

《新浪財經》微博帳號聲稱，昨日A股早盤走勢明顯比周邊國家市場更為強勁，喺重挫後吸引外資持續買入，資金淨流入超過100億人民幣，最終上證指數收市上升1.26％。

雖然上證指數昨日確實高收，但據日經亞洲引述德勤（Deloitte）嘅數據，今年首季，中國IPO籌資金額只有236億（人民幣，下同），同去年同期嘅651億元相比，大幅減少咗64%；而IPO件數亦只有30件，比去年同期嘅68件少咗過一半。

因此，德勤就大幅調低咗對今年全年中國IPO嘅預測，將原本預計嘅全年IPO籌資金額範圍從2670億元至3170億元，調整至1390億元至1660億元。而對今年全年IPO件數嘅預測，亦由原本嘅260至330件調降至最低嘅115件。

德勤資本市場服務團隊嘅服務主管Dick Kay表示，佢哋預測而家中國嘅IPO速度將保持不變。

近期，北京當局發出多份文件，旨在加強監管資本市場。今年3月，中國證監會發佈咗4項文件，包括發行准入、上市公司持續監管、中介機構監管等各方面嘅措施，突顯咗「強本強基」同埋「嚴監嚴管」嘅要求。

Dick Kay 認為，中國政府收緊咗上市規則，導致好多公司唔再考慮喺中國上市，呢啲規則唔單止針對擬上市嘅公司，仲針對認購嘅投資者。

因此，唔少內地網友對於《新浪財經》呢種唱好A股嘅講法冷嘲熱諷。有網民話：「假外資還整天意淫」、「中資海外企業簡稱外資」、「就是他們（指中資）自己買的還說是外資」、「中國人使勁坑中國人」。

仲有網民指所謂「比周邊市場更為強勁」，其實係其他國家股市之前都升到創新高，淨係得A股仲係谷底，而外資早就喺美國、日本、印度發達，點會來中國。亦有網民建議「關閉股市吧，不要禍害老百姓了」。《I》