《星島》報道，全球三大航運聯盟早前大幅調整航線，令香港轉口港地位面臨威脅。同香港甚有淵源嘅東方海外表示，佢哋所屬嘅海洋聯盟今年以提升準班率為首要目標，部分航線唔再停泊香港在內嘅港口，但仍視香港係具有國際航運中心嘅優勢同吸引力。香港付貨人委員會執行總幹事何立基指出，深圳同廣州碼頭處理量正提升，香港港口吞吐量今年仍會下跌。

東方海外表示，自今年起，海洋聯盟以提升準班率為首要目標，為貨主提供更高效服務，遂對航線布局同港序作出較大幅調整，有啲航線唔再停泊部分港口；同時因應紅海危機，有一條靠泊香港嘅航線亦暫停運作。

受疫情同地緣政治事件影響，全球航運公司嘅準班率大幅降低，航運研究機構Sea-Intelligence數據顯示，舊年海洋聯盟準班率為55.3%，據疫前逾70%有一定距離。

航運界即將迎來新整合，而家三大聯盟係2M聯盟、海洋聯盟同THE聯盟，但2M嘅馬士基同THE嘅赫伯羅特將喺2025年另組新聯盟「雙子星」，導致2M解散。雙子星擬定嘅歐亞航線中，已經唔再將香港作停靠點，取而代之係鄰近嘅深圳鹽田港。至於海洋聯盟成員就不變，合作期延至2032年，但亦因航運業洗牌嘅競爭，今年起涉及停靠香港嘅遠洋航線已由11條降至6條。

另外，香港付貨人委員會執行總幹事何立基指出，深圳同廣州碼頭嘅處理量正不斷提升，香港港口吞吐量出年仍會節節下跌。何立基指出，香港港口一直被深圳同廣州嘅港口搶奪生意，呢啲碼頭至今仍繼續擴建，係香港無可避免嘅困局，「船公司二揀一，當然選擇去處理量大嗰度」，相信隨着航運公司持續減少停靠點，未來幾年香港嘅吞吐量會繼續節節下滑。但佢又話，好多港口亦正同香港面對同一命運，而過去好多風光一時嘅碼頭依家已跌出全球十大，「其實香港又唔係好慘。」

本港碼頭向來以「守尾門」著稱，以高效率操作為航運公司追回船期。何立基認為，呢個優勢仍在，但其角色喺近年難以發揮，因為全球供應鏈打亂之後，航運新常態已唔將準時擺喺頭位，「船公司寧願慳油，如果行慢咗就『飛站』由下一班做，情況非常普遍」。何立基指出，香港碼頭喺處理東南亞、南美等航線嘅貨物整合，仍具競爭力。

翻查香港海運港口局數據，佔本港七成貨運量嘅葵青貨櫃碼頭吞吐量，去年十二月止已經連跌25個月，創有紀錄最大跌幅，吞吐量喺去年全年跌14%，創有紀錄最大年度跌幅，更連跌兩年。如果計埋其他貨櫃碼頭，去年本地港口只處理咗1440萬標準貨櫃單位（TEU）貨櫃，按年挫13.7%，由2018年起計更是連續下跌六年，較2013年高位更是減少了三成半。

2023年全球前十大貨櫃港排名，喺二十年前曾排名第一嘅香港，2023年排名再下跌一位，已經降至全球第十，如果唔係荷蘭鹿特丹港跌到第12名，香港更早已跌出十大。《I》