《彭博》今（11日）報導，好多香港上市公司嘅股票估值，都低過歐洲同美國嘅公司。有顧問公司分析，今年會有更多企業選擇私有化退市，然後去其他國家上市，爭取更高估值，甚至中資亦考慮離場，因為國企有現金，融資條件改善，加上公司股票估值低，令佢哋考慮私有化香港上市嘅實體。

香港恆生指數係過去 12 個月全球表現最差嘅主要股指，下跌約 16%，而標準普爾 500 指數則上升 27%，日本日經225指數上升超過40%。

今年頭季港股IPO僅有12宗，集資額不足50億元，全球排名跌至第10位。上市交易唔多嘅情況下，港股私有化市場卻好活躍，化妝品牌歐舒丹（L’Occitane）將結束在港上市14年嘅歷史。有消息指，行李箱製造商新秀麗（Samsonite）仲未排除私有化交易，同時考慮喺美國雙重上市。

全球諮詢公司安邁（Alvarez & Marsal）總經理劉佑昌話，香港上市公司嘅股價都低過歐美公司。以前香港吸引全球企業，但而家唔再係咁。佢預計今年會有更多港股私有化，因為「企業喺其他交易所見到更多價值，可以接觸到其他全球投資者」，佢甚至話呢一切依家「只係個開頭」。

法國巴黎銀行亞洲併購部門主管Richard Griffiths分析，香港私有化交易需求強烈，好多公司同私募股權公司都考慮相關可能性。瑞銀集團亞太併購主管Samson Lo話，中國國企亦考慮私有化香港上市，因為「國企有現金，融資條件改善，估值低，所以而家係好時機」。今年初中國醫藥集團亦表明，考慮可能將旗下中國中藥私有化。

另外，部分香港上市公司則選擇本地轉移。其中總部位於香港嘅地產公司ESR Group因股價爆跌，今（11日）盤中股價暫報8.5元港元，較2021年股價高峰大跌71%，該公司最大股東正在研究各種選擇，包括考慮私有化。而香港寬頻有限公司所有者亦正考慮，包括公司私有化或引入新投資者。

報道指，銀行家對私有化交易充滿希望。瑞銀Samson Lo表示：「未來幾個季度，我哋好可能會見到更多呢類交易……無論係全球品牌定係國企私有化交易，只係時間早晚嘅問題」。《I》