依家乜嘢都同國家安全有關，金融當然都唔例外。財政司司長陳茂波話，金融係「無硝煙戰場」，需非常警惕、穩守及監察金融安全，避免對祖國造成不必要風險。強調政府準備好隨時「㩒熄」可能發生嘅金融風險。有網民就認為應該做多啲，「㩒熄港交所就解決潛左風險」。

立場親建制嘅《星島日報》專訪陳茂波。記者主動問佢，維護國家安全對於鞏固香港國際金融中心地位，以及吸引外資上有何重要性？佢話安全同穩定嘅環境對投資者好緊要，政府同唔同嘅國際金融機構、投資者同埋基金接觸交流嘅時候，會得到清晰嘅訊息。佢話，一個安全、穩定嘅環境，係佢哋做出投資考慮嘅前提。

佢提到2019年反修例運動期間，到外面推廣香港，國際社會例如金融界、商界都好關注香港係咪安全。當時社會環境動盪，亦令投資者有所顧慮。佢強調，安全係發展嘅前提，但應該統籌兼顧兩者。有發展就有資源，以進一步鞏固國家安全。

佢話，一講到國家安全，好多人都會諗到領土安全、軍事方面等，但經濟範疇亦同國家安全關係密切。要搞亂一個地方甚至一個國家，其實金融係一個冇硝煙嘅戰場，可以造成好大嘅後果。因此穩守金融安全唔單止對香港嘅國際金融中心地位重要，對國家嘅金融安全亦非常重要。

陳茂波強調，香港作為國際金融中心，匯聚全世界資金同埋國際人才，自由進出，亦係國家嘅重要國際金融中心。因此需要非常警惕，監察唔同金融市場嘅環節情況，確保金融運作有序。資金自由進出嘅同時，亦要留意資金流向，避免對內地造成唔需要嘅風險。

對於陳茂波高舉國安大旗，有網民表示：「支持轉做計劃經濟，只有黨控制一齊先至保障到國家安全」、「有咩金融市場係無風險，話我知我即刻訓身 」、「會唔會拘捕啲唱衰港股嘅網民？」、「㩒熄哂成個港股」等。《I》