中國經濟萎靡不振，想搵份工都好困難，唔少年輕人被逼響應官方「靈活就業」號召，投入職業直播主大軍。數據顯示，中國內地職業直播主已經超過1500萬人，係香港人口嘅兩倍以上，等於每100人中就有超過1人係直播主。但係，95%嘅內地直播主每月收入唔夠5000蚊人民幣。

據《環球時報》8日刊登一篇中國科學院大學經管學院教授呂本富嘅文章，入面引用《中國網路視聽發展研究報告（2024）》顯示，截至舊年12月，內地全網短片同音樂賬號總數嚟咗15.5億個，有1,508萬人當作主業做直播，即平均每100人就有1人係職業主播。

從宏觀層面睇，舊年內地長片、短片、直播、音樂等網絡視聽行業市場規模首次突破萬億，主要短片平台日均更新量近8000萬，日直播場次超過350萬場，71.2％嘅用戶曾因為睇短片或直播買過商品。

事實上，數據唔止反映直播經濟嘅蓬勃發展，亦都揭示咗行業內部嘅好多挑戰。喺呢個看似繁榮嘅行業入面，主播哋面臨職業發展嘅瓶頸、收入分配嘅唔均等問題。呂本富表示，直播行業多元化、流量去中心化嘅模式有助於打破固有認知，發掘地方發展潛力。但有三個問題必須同時正視，以防患未然。

一係線下管理問題。呂本富話，線下直播嘅「困民」同「擾民」問題，正有愈演愈烈嘅趨勢。好多城市嘅角落遍佈撐住手機嘅主播，有啲甚至喺橋洞下紮堆通宵唱歌，有啲喺景區裡因爭搶位置發生爭執。點樣因地制宜、做好規劃管理，讓主播與居民兩不相擾，係各地相關部門必須思考嘅問題。

二係主播嘅職業發展問題。呂本富指出，2024年2月，人社部發佈《新就業形態勞動者休息和勞動報酬權益保障指引》等文件，旨在為外賣騎手、網約車司機、快遞員等群體提供勞動保障、改善就業環境。職業主播人數係外賣騎手數量近兩倍，佢哋特別係低收入主播嘅基本勞動保障如何得到履行，亦都值得關注。

三係另類嘅「脫實向虛」問題。而家嘅職業主播中，18至29歲年齡段佔總體嘅64.2%，好多人一畢業就開始直播創業。事實上，資料顯示，以直播為主要收入來源嘅主播入面，95.2%嘅人月收入唔到5000元人民幣，月收入10萬元以上嘅主播只有0.4%。

而行業內大主播、直播工會等對小主播嘅可能壓制，或許會令年輕人錯過關鍵嘅職業成長期，虛耗時光。對於呢個問題，一方面應該加大對網紅孵化公司誤導性宣傳嘅監管同懲處力度，另一方面做好年輕人嘅就業教育。《I》