美國投資銀行摩根史丹利前首席經濟學家及亞洲區主席羅奇（Stephen Roach），接受《自由亞洲電台》專訪時透露，上周喺北京出席中國發展高層論壇時，無論喺活動舉行之前、期間同之後，都被警告不准就香港問題發表意見。佢批評其他香港與會者，冇向北京如實反映香港嘅情況。

羅奇，呢位曾經嘅中國經濟「大好友」，佢喺2月份，兩次喺英國《金融時報》投稿，直言「香港已經完」，而前特首林鄭月娥喺2019年推出嘅《逃犯條例》就係香港經濟由盛轉弱嘅轉捩點，自此香港嘅優勢就一去不返；佢另一篇文章感嘆現已很難再「重造一個大家以前心愛嘅香港」。

羅奇以耶魯大學傑克遜全球事務研究所高級研究員嘅身份，獲邀出席咗3月24日至25日喺釣魚台國賓館舉行嘅「中國發展高層論壇」。呢個論壇係由前總理朱鎔基喺廿多年前發起嘅，目的係提供一個平台，讓中央嘅財金官員同國內外嘅有識之士真誠地討論中國經濟問題。自從2000年起，羅奇已經連續24年參與呢個高規格嘅經濟論壇，佢係參與時間最長嘅外國代表之一。

羅奇本來希望表達對香港未來嘅擔憂，但卻被勸阻。佢批評今屆嘅論壇比歷屆有更多限制，無論係喺活動舉行之前、期間同埋之後，主辦方都好清楚表示唔想公開聽到尖銳嘅問題，只希望著眼於「對中國有建設性嘅睇法」。羅奇表示：「我寫過幾篇文章，對香港嘅未來表示嚴重關切。呢啲涉及北京敏感嘅問題，好大程度上係因為呢個原因，佢哋要求我唔好喺中國發展論壇上傾呢啲問題。」

羅奇指出，佢嘅論點係基於經濟，而唔係政治考慮，幾乎冇人反對佢嘅核心論點。佢直言，喺北京期間，香港嘅學術界同企業界代表冇真實反映香港嘅情況。佢話自己同好多身處香港嘅朋友，普遍同情香港作為一個獨立、充滿活力、堅韌性強嘅經濟體，批評23條立法已經為「一國兩制」規定下政治和政策自主蒙上陰影。佢擔心中美衝突的背景，再加上23條，會加劇外國人才外流。

羅奇透露，國際證券公司特別擔心亞太區嘅業績大幅下降，管理層密集討論香港營商嘅政治風險，而且擔心華府制裁行動帶嚟嘅影響，因為一旦個別北京或港府官員受制裁，外國企業無法同受制裁人員繼續接觸，否則會違反美國法律。

羅奇表示搬離香港後，曾經多次回港探訪，單單2023年便已經去香港三次，被問到23條通過後會否擔心再到不了香港，羅奇沉默咗一陣先回答，「如果建設性嘅批評引起政客同商人嘅不舒服反應，佢哋需要審視自己。如果佢哋唔希望我回到佢哋嘅國家、城市或經濟體，因為我令佢哋感到不舒服，我將繼續寫文章、演講、同自由亞洲電台等平台交談，努力講出真相。」《I》