復活節長假頭3日，約有150萬港人選擇離港旅遊。香港餐飲聯業協會會長黃家和今早喺港台《千禧年代》節目中指出，預期今年復活節期間，餐飲業整體生意可能會較去年同期下跌3成或以上，形容為業界一個「巨大警示」。不過就有網民認為，如今香港「由治及興」，有咗國家安全，「做少啲生意有咩所謂?」

黃家和表示，大批市民選擇離港旅遊對餐飲業影響極大，尤其是對高端食肆影響最為明顯，因為這些食肆通常吸引的是消費力較高嘅客人。佢又指出，雖然復活節期間有部分旅客來港，但來港人數仍然不及離港人數，即使有Art Central、Art Basel等大型活動舉行，但這些活動集中在維港兩岸，只有少數商店能夠受惠。

佢對餐飲業未來嘅經營感到擔憂，指出過去一個月已有約200至300間食肆結業，並預計今年4月份可能會持續出現食肆結業的情況。

黃家和表示，澳門同樣受到市民北上旅遊風潮的影響，但當地政府積極吸引內地旅客消費，因此澳門市面非常繁榮。他認為，未來香港餐飲及旅遊業可能需要與澳門合作推出「打包式」旅遊活動，並需要進行重大嘅轉型，才能夠幫助業務發展。

假期期間大量港人北上消費，傳統旅遊熱點西貢嘅人流明顯減少，好多店舖甚至關門不營業，有些商戶表示這是數十年來最差嘅生意情況。

有一間餐廳嘅老闆馮小姐唉聲嘆氣地講：「根本受不了，租金又貴，冇人流根本做唔落去，現時大家都在『捱打』，西貢整個市道都很靜。」

另一間餐廳老闆蔡先生話：「幾十年嚟，我從來都冇見過西貢假期咁冷清嘅情況，冇幾多人留港消費，唔係去外國，就係返去內地，最多人嘅地方係關口。香港政府是否應該關注呢個問題呢？大灣區係好事，不過唔可以將所有人都推向大灣區，香港點算？」

喺連登討論區上，有網民就冷嘲熱諷咁話：「有國家安全 做少啲生意有咩所謂?」、「而家先啱啱開始咋喎」、「佢哋悲觀姐，呢啲叫做犧牲下」，亦有網民認為：「正常人都唔入西貢食野啦，一定出番去食」、「海鮮價劏遊客嘅日子，唔會返嚟㗎啦」等。《I》