自從本港「由亂到治」以嚟，新加坡喺各項指標大多碾壓香港。好彩，依家終於由一項指標由香港贏咗啦，甚至仲冠絕全球添！美世人力資源顧問公司（Mercer）公布2023年《生活成本城市排名》，香港力壓新加坡及蘇黎世，再次蟬聯全球生活成本最高嘅城市，本港終於跟隨祖國「洋溢著樂觀向上的氛圍」。

關於排名嘅統計方法以紐約為基準，同時對全球227個城市進行超過200項目嘅比較，包括住屋、交通、食物、服裝、日常用品同埋娛樂，然後再換算成美元進行互相比較。呢個美世嘅報告有助跨國企業同政府決定點樣喺海外安排員工嘅補償策略。

佢哋認為，成本唔係影響員工同公司選擇喺當地工作嘅唯一考慮因素，當地嘅生活質素同樣重要。而風險同其他負面因素，例如天災、政治同經濟動盪、犯罪率高企、基建不足等都係令企業同員工猶豫唔決嘅主要原因。

韓國《朝鮮日報》指出，首爾喺排名上超越咗東京、倫敦、杜拜、巴黎、維也納同芝加哥等城市，主要係因為當地嘅物價上漲。根據美世嘅統計，首爾嘅牛油價格同上一年相比增加咗26%，「跑贏」咗全球平均增幅嘅23.8%，反映出當地物價普遍上漲。

另一個城市嘅生活成本高低同生活質素唔一定有直接關係，特別係喺經歷完疫情之後。好多員工都重新考慮自己嘅優先事項，以及工作同生活之間嘅平衡，所以點樣揀一個既可以工作又可以同家人享受生活嘅地方就更加重要。

美世嘅2023年《國際員工生活質素排名》顯示，奧地利嘅維也納以其豐富嘅歷史、壯觀嘅建築同充滿活力嘅文化環境，成為全球生活質素最高嘅城市。蘇黎世同新西蘭嘅奧克蘭分別排名第二同第三。

雖然本港喺全球生活成本排名上嘅「稱霸」，但香港嘅生活質素淨係排行第77位，遠遠落後於同澳洲阿德萊德並列第29名嘅新加坡。

喺連登討論區上，唔少網民對此事表達睇法，有網民話：「又贏！」、「邊個話我地香港唔得」，顯示出大家都唔係咁悲觀，有睇到「由治即興帶嚟嘅好處」。但亦有網民指出「以前成日話係日本食野好貴，而家掉番轉」、「高成本但質素低」、「啲錢用晒去交租比班吸血鬼」等，顯示政府反駁隊仲有唔少努力空間。《I》