《美國之音》報道，黎智英案中嘅第四位「從犯證人」李宇軒，據報喺深圳關押期間受過酷刑。而就喺李宇軒入庭作供嘅時候，被指黎智英「共謀」嘅四人同其他外國政界人士表示，強烈譴責李宇軒所受嘅酷刑，同迫使佢做證指控黎智英嘅情況。

星期三，李宇軒開始喺庭上作供，講述佢喺2019年6月社會運動時點點滴滴，包括佢點樣策劃國際登報計劃，希望喚起外國社會對香港示威嘅關注。同一日，有好多政界人士都發表影片，佢地講述李宇軒嘅遭遇，痛批控方嘅作為。

斯洛伐克籍歐洲國會議員萊克斯曼（Miriam Lexmann）曾經去年喺香港觀察區議會選舉，亦同李宇軒見過面。佢話，李宇軒係一個和平、善良同埋謙遜嘅民主活動份子。

英國大律師肯尼迪女男爵（Baroness Helena Kennedy KC）指出，《華盛頓郵報》嘅證據指李宇軒喺中國被扣留期間受過酷刑，法庭唔應該接受嘅係透過酷刑取得嘅證供。佢話：「我呼籲處理黎智英審訊嘅法官同法庭認定，呢啲證據唔應該被接納。」

被指為黎智英案嘅「共謀」，推動馬格尼茨基制裁嘅金融及人權活動家布勞德（Bill Browder）就指出，佢從來都冇同黎智英見過面或者聯絡過。佢話：「我被點名為『共謀』，顯示控方有幾荒謬，香港政府同中國共產黨希望透過李宇軒，嚟冤枉黎智英。」

前日本眾議院議員菅野志櫻里亦指，佢從來冇同黎智英聯絡過，但都被控方點名為「共謀」。佢話：「我好反對控方用我嘅名宇，去支持針對黎智英嘅荒謬指控。日本政府已經向我保證，佢哋會密切關注呢個案件，唔會坐視唔理。」

同樣被指為「共謀」嘅香港民主運動人士劉祖廸表示，佢同李宇軒係好好朋友，李宇軒絕對冇犯罪。佢話：「我哋唔可以坐視唔理，我哋需要全力支持政治受害者李宇軒同黎智英，令佢哋重獲自由。」

聯合國酷刑問題特別報告員愛德華茲（Alice Jill Edwards）喺新聞稿表示，佢對李宇軒據報受虐待深表關注，要求喺李宇軒作供前立即調查呢啲指控。

《華盛頓郵報》早前報道，李宇軒喺被截獲後，被關押喺深圳鹽田看守所時受過酷刑。審問期間，警衛威脅佢哋如果唔公開偷渡細節，就會將佢哋送到新疆。消息人士亦指，李宇軒嘅囚室經常傳出尖叫聲。《I》