日本《共同社》引用匿名消息人士報道，《南華早報》記者陳敏莉（Minnie Chan）10月尾去北京採訪軍事安全論壇之後失蹤。香港知名評論員蕭若元，亦引述消息來源確認此事。

《共同社》嘅報道話，陳敏莉喺10月29至31號採訪喺北京舉行嘅「香山論壇」，消息人士表示，佢最後一次同人聯絡係11月1號，之後就冇人知佢去咗邊。《南華早報》回應話，陳敏莉而家休緊假，但因為「私隱問題」唔能夠透露更多。香港記者協會發聲明指，十分關注陳敏莉嘅安危，正向《南早》了解事件。

香山論壇係喺2006年，由解放軍軍事科學院屬下嘅「中國軍事科學學會」主辦，官方將佢定位為安全同防務對話嘅平台，每兩年舉行一次。今屆有至少90個國家同國際組織嘅官方代表團確認參加。過去嘅論壇開幕式，通常都係由中國國防部長做主題演講，但因為李尚福早前被免職，所以今次就由中央軍委副主席張又俠代替發表演講。

陳敏莉專門報導中國嘅國防同外交事務，佢最後一篇嘅報道，係喺11月1日有關中國對以色列同哈瑪斯戰爭嘅反應。陳敏莉嘅朋友對《共同社》表示，佢哋擔心陳敏莉可能已經被中國當局調查。

陳敏莉嘅Facebook帳號喺11月11號發咗啲似係佢仔女嘅相，但有朋友喺下面留言問「呢啲唔係佢貼嘅。佢喺邊？」同「我再提醒一次：佢喺邊？」，顯示有朋友已經兩星期未能同佢聯絡。根據陳敏莉喺商業社交平台LinkedIn嘅資料，佢喺《南華早報》做咗差唔多20年記者，之前喺香港《蘋果日報》寫過新聞。

總部位於紐約嘅非營利組織「保護記者委員會」（CPJ）表示，中國係世界上監禁記者情況最嚴重嘅國家之一，根據CPJ發布嘅報告，到2022年底，至少有43名記者喺中國被監禁。《I》