一對香港夫婦曾先生同關小姐，早前喺網上開設「Save Lily」專頁，要求瑞典當局執行2024年9月移民上訴法院嘅遣返裁決，將4歲女兒Lily送返香港。二人聲稱，女兒被瑞典社福系統不合理帶走，父母同子女長期分離。不過，隨住更多法庭文件同相關資料曝光，呢對夫婦疏於照顧嘅種種惡行逐步被外界認識。

當地法庭文件顯示，呢個家庭過往嘅照顧背景相當複雜。曾先生同關小姐多年來曾經長時間流浪歐洲，多次處於非法居留狀態，生活安排非常唔穩定。兩人長女2019年喺芬蘭屋企出世後約一個月死亡，芬蘭警方一度循疏忽照顧同誤殺方向調查兩人，案件其後撤控。雖然撤控代表當地無繼續以刑事方式追究，但呢段經歷，明顯成為瑞典社福部門同法庭評估兩人照顧能力時嘅重要背景。

文件亦披露，兩人當年喺芬蘭堅持喺無專業醫療支援下喺屋企分娩，首名嬰兒出世僅約一個月後夭折；其後更被指隱瞞死訊同自行處理嬰兒遺體。當執法部門展開調查期間，兩人據報帶同大量現金離開當地。相關往績令外界關注，呢宗個案並唔係單純父母同外國社福制度之間嘅爭拗，而係牽涉兒童可唔可以得到基本保護嘅問題。

至於次女Lily，據報佢無正式出世紙，亦長期無穩定接觸公共服務。瑞典法庭文件指，社福部門接觸Lily時，發現佢牙齒同皮膚狀況嚴重欠佳，日常生活同社會幾乎完全隔絕。法庭其後認為，父母未能夠為佢提供安全、穩定同可預期嘅成長環境，因此由瑞典當局接管照顧。

案中最受關注嘅一段生活狀況，係一家三口曾經長期住喺超市停車場一架客貨車入面，過住近乎與世隔絕嘅生活。據法庭紀錄，喺北歐寒冷天氣下，當時年僅兩歲嘅Lily只着住單薄睡衣，身上有因長期無適當護理而惡化嘅嚴重濕疹，口腔亦有多隻嚴重蛀壞嘅牙齒。呢種生存環境，已經超出一般照顧不周嘅層面，成為瑞典當局介入嘅核心理由之一。

瑞典社福制度一向高度重視兒童保護，曾先生同關小姐其後多次要求瑞典落實遣返裁決，將Lily送返香港。佢哋透過「Save Lily」專頁發文，指父母有權同子女團聚，亦批評瑞典社福制度處理不公。不過，反對聲音認為，兒童福利個案唔可以只按父母意願決定，即使有遣返裁決，最終仍然必須以兒童最佳利益作首要考慮。

事件另一個爭議，係兩人返到香港後，再度喺屋企分娩，生咗一名男嬰，但其後以宗教理由拒絕提供DNA鑑定。由於缺乏相關證明，男嬰至今仍然未能完成法律身份確認，孩子日後喺出生登記、醫療、教育同福利安排上，都可能面對實際困難。

雖然父母享有管教子女、選擇生活方式同宗教信仰嘅自由，但呢種自由並唔係無限。當兒童出現嚴重健康、身份、照顧同安全風險時，社會同政府有責任介入。兒童唔係父母嘅私人物品，而係擁有獨立權利嘅個體。公眾唔應該只聽父母一方講法，而係孩子係咪安全、係咪得到基本照顧。