古巴外交部長帕里拉（Bruno Rodriguez Parrilla）於當地時間周26號喺聯合國安全理事會發表演說，向國際社會發出緊急求助，呼籲各國採取行動，以防止呢個遭受美國嚴重能源封鎖嘅國家發生更嚴重嘅人道災難。

古巴長期受美國制裁，加上今年初美國喺委內瑞拉採取軍事行動並推翻馬杜羅（Nicolas Maduro）政府後，切斷咗古巴最重要嘅石油供應來源，導致古巴能源供應陷入癱瘓。目前古巴電力系統不堪重負，全國性停電已成為「家常便飯」，部分地區甚至每日停電長達 20 小時。

喺夏灣那等城市，停電期間居民生活大受影響，唔少人需要用柴火煮食，醫院嘅基本醫療服務亦因為電力不足而嚴重延誤，過萬宗手術被逼推遲，疫苗接種計劃亦大受影響。聯合國官員指出，古巴現時正面臨「人道崩潰」嘅風險，超過 200 萬人嘅基本生活需求難以得到保障。

帕里拉喺安理會上嚴詞批評美國近期嘅連串行動，包括對古巴前總統勞爾·卡斯特羅（Raul Castro）進行起訴。佢強調，呢啲指控純屬政治動機，係美方尋找藉口以顛覆古巴政權。帕里拉反駁美國指古巴威脅國家安全嘅講法，直指：「呢個係違背邏輯同常理嘅諗法，請畀古巴平靜生活啦。」

美國方面，特朗普政府立場強硬。國務卿盧比奧（Marco Rubio）近日多次警告，美方正密切關注古巴局勢，並揚言要徹底改變當地嘅共產主義體制。美方甚至曾開出條件，聲稱願意提供援助，但被質疑係想藉人道援助之名，繞過古巴政府直接建立對古巴嘅影響力，甚至計劃為當地提供「星鏈」（Starlink）網路及基礎設施支持，企圖動搖當地體制。

面對古巴嘅緊急求助，國際社會反應不一。雖然歐盟、加拿大等國家早前已針對古巴嘅能源危機撥出數百萬美元的人道援助，用於應對糧食短缺及清潔飲用水問題，但相較於古巴龐大嘅物資需求，呢啲援助只係「杯水車薪」。

雖然俄羅斯早前曾嘗試運送石油協助古巴短暫紓困，但面對美方嘅嚴密海上封鎖，能源供應鏈極不穩定。聯合國目前正嘗試透過制定行動計劃，包括推動太陽能等可持續能源方案，試圖減少古巴對脆弱嘅國家電網依賴，但執行上面臨巨大物流挑戰。

古巴目前嘅局面可謂係「內憂外患」。一方面，長年累月嘅經濟禁運令社會物資極度匱乏；另一方面，隨著美國施壓力度不斷升級，古巴嘅生存空間正被進一步壓縮。隨著古巴正式喺國際場合高調求助，呢個加勒比海國家係咪能夠喺強權夾縫中生存落去，抑或會走向不可逆轉嘅崩潰，目前仍係未知之數。

根據國際能源署嘅資料，古巴發電結構嚴重依賴石油，高達 83% 嘅電力來自燃油發電，係中南美洲比例最高。正正係因為呢種單一、脆弱嘅能源結構，令佢喺面對外部制裁切斷燃料供應時，社會運作會迅速陷入癱瘓。如果唔能解決能源自給或多元化問題，單靠國際短期援助，好難從根本上扭轉呢場「能源災難」。